Kikongwe wa miaka 80, wenzake mbaroni kwa madawa ya kulevya

 

Kamanda wa Polisi Mkoa wa Kusini Pemba, Ahmed Khamis Makarani. Picha na Mtandao.

JESHI la Polisi Mkoa wa Kusini Pemba visiwani Zanzibar linawashikilia watu watatu akiwemo mama mwenye miaka 80 kwa tuhuma za kupatikana na bangi kete 554 na unga kete 7,447 zinazoaminika kuwa ni dawa za kulevya, Diramakini inakudokeza...

Kamanda wa Polisi Mkoa wa Kusini Pemba, Ahmed Khamis Makarani amesema, washitakiwa hao wamekamatwa ndani ya nyumba wanayoishi eneo la Msingini Wilaya ya Chake Chake kisiwani Pemba.

Amewataja watuhumiwa hao kuwa ni Haji Rashid Khamis, Naima Rashid Khamis wanaoaminika kuwa ni ndugu pamoja na Asia Luciano.

Kamanda Makarani amesema, baada ya kupata taarifa kutoka kwa wasamaria wema kuwa nyumba hiyo inahusika na biashara haramu ya dawa za kulevya,ndipo walipoamua kufanya uchunguzi na wakafanikiwa kuwakamata watuhumiwa hao.

Aidha, mbali na kutoa wito kwa wananchi kuendelea kuwafichua wote wanaojihusisha na biashara hizo, Kamanda huyo amesema, watuhumiwa hao watafikishwa mahakamani pale taratibu zitakapokamilika muda wowote.

Je, una habari,maulizo au tangazo? Tuwasiliane; diramakini@gmail.com