BAADHI ya
watendaji wa wilaya na halmashauri za mikoa ya Kanda ya Kati
inayojumuisha mikoa ya Iringa, Dodoma na Singida wameipongeza Serikali
kwa kutunga Sheria ya Huduma Ndogo za Fedha ya mwaka 2018, kwa lengo la
kuviendeleza na kuvimarisha vikundi vyote vinavyofanya biashara ya
huduma ndogo za fedha na kutoa mafunzo ya kuwawezesha wananchi
kutekeleza sheria hiyo, anaripoti Farida Ramadhani kutoka Morogoro.
Hayo yameelezwa mjini Morogoro katika mafunzo ya Sera, Sheria na Kanuni za Huduma Ndogo za Fedha kwa watendaji hao ambayo yameandaliwa na Wizara ya Fedha na Mipango kwa kushirikiana na Ofisi ya Rais Tawala za Mikoa na Serikali za Mitaa (TAMISEMI), Benki Kuu ya Tanzania (BoT), Tume ya Maendeleo ya Ushirika Tanzania pamoja na Mfuko wa Maendeleo ya Sekta ya Fedha (FSDT).
Watendaji hao wameahidi kuisaidia Serikali kusimamia na kuhamasisha zoezi la usajili na ukataji leseni kwa watoa huduma ndogo za fedha kwa mujibu wa sheria ili kuwezesha utekelezaji wa sheria hiyo kwa maendeleo ya uchumi wa nchi.
 |
| Baadhi ya washiriki wa mafunzo ya Sera, Sheria na Kanuni za
Huduma Ndogo za Fedha kwa watendaji wa Wilaya na Halmashauri za Kanda ya
Kati kutoka mikoa ya Iringa, Dodoma na Singida wakifuatilia kwa makini
mada mbalimbali zilizowasilishwa wakati wa mafunzo hayo, yaliyofanyika
mjini Morogoro. Picha na WFM/Diramakini. |
Wakitoa maoni yao kuhusu utekelezaji wa sheria hiyo watendaji hao wamesema kuwa, elimu hiyo imetolewa wakati mwafaka na wanaamini itakuwa mwarobaini wa changamoto mbalimbali zilizokuwa zinaikabili sekta ndogo ya fedha ikiwemo utoaji wa mikopo kwa wananchi kwa vigezo na masharti magumu yanayowasababishia wananchi madhara mbalimbali kama vile kufilisiwa.
“Wananchi hususan wastaafu wameteseka kwa muda mrefu kutokana na mikopo ambayo masharti yake hayapo wazi, unakuta mstaafu anakopa fedha ndogo, lakini baada ya miezi michache anatakiwa kulipa mara kumi ya kile alichokopo hadi unashangaa huyu mtu wamemkata riba kwa asilimia ngapi na wakopeshaji ukiwauliza mikataba wanakuwa sio wawazi,”anasema Katibu Tawala wa Wilaya ya Iramba mkoani Singida,Sango Songoma.
 |
| Kamishna wa Idara ya Uendelezaji Sekta ya Fedha wa Wizara ya
Fedha na Mipango, Dkt. Charles Mwamwaja akifafanua jambo wakati wa
mafunzo ya Sera, Sheria na Kanuni za Huduma Ndogo za Fedha kwa watendaji
wa Wilaya na Halmashauri za Kanda ya Kati kutoka mikoa ya Iringa,
Dodoma na Singida yaliyofanyika mjini Morogoro. Picha na WFM/Diramakini. |
Naye Katibu Tawala wa Wilaya ya Mpwapwa,Sara Komba ameshauri elimu hiyo itolewe kwa kasi ili wananchi wengi hususan wale wa vijijini waweze kupata elimu hiyo ambayo itawanusuru na matapeli wanaoitumia vibaya Sekta Ndogo ya Fedha na kuwaongezea wananchi umaskini.
Mafunzo hayo yamefunguliwa na Kamishna wa Idara ya Uendelezaji Sekta ya Fedha, Dkt. Charles Mwamwaja ambaye aliwataka watendaji hao kushirikiana na Serikali katika kuhakikisha sheria inatekelezwa ili kuboresha usimamizi na udhibiti wa sekta ndogo ya fedha nchini na kuwa na sekta ya fedha iliyo endelevu na yenye kutoa mchango mkubwa katika ukuaji wa uchumi na kupunguza umaskini.
 |
| Mtoa mada Mwanasheria wa Serikali kutoka Wizara ya Fedha na
Mipango, Nyanzala Nkinga akielezea majukumu ya Waziri mwenye dhamana
ya fedha kwa mujibu wa Kanuni za Huduma Ndogo za Fedha za mwaka 2019
wakati wa mafunzo ya Sera, Sheria na Kanuni za Huduma Ndogo za Fedha kwa
watendaji wa Wilaya na Halmashauri za Kanda ya Kati kutoka mikoa ya
Iringa, Dodoma na Singida, yaliyofanyika mjini Morogoro.Picha na WFM/Diramakini. |
Ameahidi kuwa elimu hiyo itaendelea kutolewa nchi nzima ili kuhakikisha wadau wote muhimu wanafikiwa na kuwawezesha kufuata matakwa yote ya Sheria kwa maendeleo ya uchumi wa nchi.
 |
| Mkurugenzi wa Halmashauri ya Ikungi mkoani Singida,Justice
Likijazi akichangia mada wakati wa mafunzo ya Sera, Sheria na Kanuni za
Huduma Ndogo za Fedha kwa watendaji wa Wilaya na Halmashauri za Kanda ya
Kati kutoka mikoa ya Iringa, Dodoma na Singida, yaliyofanyika mjini
Morogoro ambapo aliipongeza Serikali kwa kutoa elimu hiyo muhimu ambayo
itarahisisha utekelezaji wa Sheria hiyo. Picha na WFM/Diramakini. |
e, una habari,maulizo au tangazo? Tuwasiliane; diramakini@gmail.com