 |
|
Waziri wa Nishati wa Tanzania, Dokta
Medard Kalemani (katikati), akisisitiza jambo kwa wataalamu aliofuatana nao
katika ziara yake kukagua utekelezaji wa miradi ya umeme wilayani Arusha,
Agosti 16, 2020. Kulia ni Mkurugenzi Mtendaji wa Shirika la Umeme nchini Tanzania (TANESCO), Dokta Tito Mwinuka na
kushoto ni Kaimu Mkurugenzi Mkuu wa REA, Mhandisi Amos Maganga. Wa pili kutoka
kushoto ni Kaimu Kamishna wa Umeme na Nishati Jadidifu, Mhandisi Innocent
Luoga. Picha na Veronica Simba. |
SERIKALI ya Jamhuri ya Muungano wa Tanzania imetenga shilingi Bilioni 103.8 kwa ajili ya kupeleka umeme katika maeneo yaliyo pembezoni mwa majiji, mikoa, manispaa na miji, nchi nzima, anaripoti Veronica Simba kutoka Arusha...
Dokta Medard Kalemani ambaye ni Waziri wa Nishati nchini Tanzania amebainisha hayo kwa nyakati tofauti alipokuwa katika ziara ya kikazi mkoani Arusha.
Akizungumza muda mfupi kabla ya kuwasha umeme katika Shule ya Sekondari Moivaro na baadaye Shule ya Sekondari Nyahiri Terrat, Dkt.Kalemani amesema kuwa, Serikali inaendelea kuwaunganishia umeme wananchi wa maeneo ya aina hiyo nchini kote kwa gharama ya shilingi 27,000 tu, kama ilivyo kwa vijijini.
Dokta Kalemani amesema,mpango huo wa Serikali ni kutokana na uhalisia kuwa maeneo hayo kwa kiasi kikubwa, yanashabihiana na yaliyoko vijijini, ambapo asilimia kubwa ya wakazi wake wana kipato kidogo.
 |
| Waziri wa Nishati wa Tanzania, Dokta
Medard Kalemani, akiwahamasisha wananchi wa Mtaa wa Bondeni Kati, Kata ya
Terrat, wilayani Arusha kulipia shilingi 27,000 tu ili waunganishiwe umeme. Waziri
alikuwa katika ziara ya kazi wilayani Arusha, kukagua utekelezaji wa miradi ya
umeme, Agosti 16, 2020. Picha na Veronica Simba. |
 |
 |
| Mkuu wa Wilaya ya
Arusha, Kenan Kihongosi akizungumza wakati wa hafla fupi ya kuwasha umeme
katika Shule ya Sekondari Nyahiri Terrat. Waziri wa Nishati Dokta Medard Kalemani
(kulia-Meza Kuu) ndiye aliwasha rasmi umeme katika shule hiyo akiwa katika
ziara ya kikazi Agosti 16, 2020. Picha na Veronica Simba. |
“Tulikaa tukaona maeneo haya yaliachwa muda mrefu bila kuwa na miundombinu ya umeme. Tukaona tuwapunguzie gharama kutoka mlivyokuwa mnalipa zamani shilingi 177,000 na katika baadhi ya maeneo 380,000 hadi shilingi 27,000 tu,”amesema Waziri Kalemani.
Akizungumzia Wilaya ya Arusha, Waziri Kalemani amesema, kuna mitaa takribani 26 iliyo pembezoni mwa mji na kwamba Serikali ilianza kuipeleka umeme kutoka mwaka 2018.
Amempongeza Meneja wa Shirika la Umeme Tanzania (TANESCO) Mkoa wa Arusha, Mhandisi Herin Muhina, kwa kazi nzuri anayoifanya na kumwagiza atumie muda wa miezi mitatu kuanzia sasa ili kukamilisha kazi ya kupeleka umeme katika mitaa yote iliyo pembezoni mwa mji, ambayo haijafikiwa na huduma hiyo.
 |
|
Waziri wa Nishati nchini Tanzania, Dokta
Medard Kalemani (katikati), akiwakabidhi waandishi wa habari Mkoa wa Arusha, Vifaa vya Umeme Tayari (UMETA), ili waunganishiwe katika nyumba zao. Waziri
alikuwa katika ziara ya kazi kukagua miradi mbalimbali ya umeme wilayani Arusha,
Agosti 16, 2020. Picha na Veronica Simba. |
Waziri alikiri kufurahishwa na uongozi wa Shule ya Sekondari Moivaro kuona umuhimu wa kulipia gharama za kuunganishiwa umeme na kupata huduma hiyo, ikiwa na mwaka mmoja tu tangu ianzishwe.
Ametoa rai kwa viongozi wengine katika maeneo mbalimbali nchini, kuiga mfano huo kwa kuhakikisha taasisi zote za umma zinapewa kipaumbele katika kuunganishiwa umeme ili kuongeza tija katika utoaji huduma kwa wananchi.
Kuhusu suala la wananchi kulipia nguzo ili waunganishiwe umeme, Dkt.Kalemani ameendelea kusisitiza msimamo wa Serikali kuwa ni marufuku kwa kitendo hicho na alitoa tahadhari kwa yeyote atakayebainika kwenda kinyume na maagizo hayo, atachukuliwa hatua kali.
 |
| Sehemu ya umati wa
wananchi wa Kata ya Terrat wilayani Arusha, wakimsikiliza Waziri wa Nishati,
Dokta Medard Kalemani (hayupo pichani), alipokuwa akizungumza nao muda mfupi
kabla ya kuwasha rasmi umeme katika Shule ya Sekondari Nyahiri Terrat, Agosti
16, 2020. (Picha na Veronica Simba). |
Amesisitiza wananchi kuendelea kulipia huduma ya umeme pasipo kusubiri nguzo akisema hilo siyo jukumu lao. “Wewe lipia kisha udai umeme,”amesisitiza.
Katika hatua nyingine, Waziri aligawa vifaa vya Umeme Tayari (UMETA) kwa waandishi wa habari wa Mkoa wa Arusha, ikiwa ni ishara ya kuthamini mchango wao kwa Taifa kupitia kazi wanayoifanya katika kuhabarisha na kuelimisha jamii juu ya masuala mbalimbali, yakiwemo ya sekta ya nishati.
Aidha, aligawa vifaa hivyo kwa shule alizoziwashia umeme pamoja na walimu wake huku akielekeza kuwa vitumike kuwaunganishia umeme wa gharama nafuu ambao haulazimu kutandaza mfumo wa nyaya katika jengo husika.
Kwa upande wake, Mkuu wa Wilaya ya Arusha, Kenan Kihongosi amempongeza Waziri Kalemani kwa uchapakazi wake hususan katika kuhakikisha wananchi wa maeneo mbalimbali nchini kote wanapata huduma ya umeme.
“Uchapakazi wako unadhihirisha kwa vitendo kuwa unamuunga mkono Rais wetu mpendwa, Mheshimiwa John Magufuli katika kuwatumikia Watanzania ili kuhakikisha wanajipatia maendeleo ya kiuchumi,”amesema DC Kihongosi.
Katika ziara hiyo, Waziri aliambatana na viongozi mbalimbali akiwemo Kaimu Kamishna wa Umeme na Nishati Jadidifu, Mhandisi Innocent Luoga, Mkurugenzi Mtendaji wa TANESCO, DoktaTito Mwinuka, Kaimu Mkurugenzi Mkuu wa Wakala wa Nishati Vijijini (REA), Mhandisi Amos Maganga na wataalamu wengine mbalimbali kutoka wizarani na taasisi hizo.
 |
| Muonekano wa jengo lenye baadhi ya vyumba vya madarasa katika Shule ya Sekondari Nyahiri Terrat, wilayani Arusha, baada ya kuwashiwa rasmi umeme na Waziri wa Nishati, Dokta Medard Kalemani, akiwa katika ziara ya kikazi Agosti 16, 2020. |
Je, una habari,maulizo au tangazo? Tuwasiliane; diramakini@gmail.com