 |
| Waziri Mkuu wa Jamhuri ya Muungano wa Tanzania, Kassim Majaliwa akitazama samani wakati alipoweka jiwe la msingi la Kiwanda cha Samani kinachomilikiwa na Kampuni ya Orascom
Construction and Engineering katika Kijiji cha Namkonjera wilayani
Runagwa leo. (Picha na OWM). |
WAZIRI Mkuu wa Jamhuri ya Muungano wa Tanzania, Kassim Majaliwa ametoa rai kwa wawekezaji wachangamkie fursa zilizopo nchini kwa kuangalia maeneo mazuri ya kufanya uwekezaji mpya au kupanua uwekezaji wao, Diramakini inakujuza kwa kina...
Majaliwa ametoa rai hiyo leo wakati akizungumza na wakazi wa Namichiga wilayani Ruangwa mkoani Lindi, waliohudhuria uwekaji wa jiwe la msingi kwenye kiwanda cha samani cha Saw Mill and Furniture Processing Industry na kisha kukagua eneo la ujenzi wa kiwanda cha kubangua korosho wilayani humo.
Amesema, hicho ni kiwanda cha kwanza kujengwa Ruangwa, hivyo amewataka wakazi wa Namkonjera na vijiji vya jirani wapime ardhi yao ili watu wanunue viwanja na kuanza kujenga.
“Kujengwa kwa kiwanda cha kutengeneza samani na baadaye kiwanda cha kubangua korosho, kutahamasisha uzalishaji wa mazao ya kilimo na misitu pamoja na kuimarisha mnyororo wake wa thamani. Endapo mtajipanga vizuri kwa kujenga viwanda vya kuongeza thamani kwenye zao la korosho, wilaya hii itakuwa kinara kwenye uzalishaji wa zao hilo.
“Kwa upande wa viwanda, tusiishie tu kwenye korosho, tuone pia namna ya kuwa na viwanda vya kuchakata ufuta, mbaazi na mazao mengine yanalimwa kwa wingi kwenye maeneo yetu ili kijihakikishia soko na upatikanaji wa ajira,"amesema.
Amesema, uwekezaji huo unaofanyika sasa, unakwenda sambamba na azma ya Serikali ya Awamu ya Tano ya kuanzisha na kuendeleza viwanda ili kukuza uchumi, kuleta maendeleo endelevu, kuongeza ajira na kupunguza umaskini kwa Watanzania wote.
Akifafanua kuhusu ujenzi wa viwanda nchini kote, Waziri Mkuu amesema kuimarika kwa uzalishaji hususan kupitia ujenzi wa viwanda, kumekuwa chachu ya upatikanaji wa huduma hususan kufuatia kuimarika kwa mapato ya Serikali na kutengeneza ajira kwa Watanzania.
Amesema, katika kipindi cha miaka mitano, Serikali imefanikiwa kuimarisha sekta za kiuchumi na uzalishaji ikiwemo viwanda na biashara. “Katika kipindi hicho jumla ya viwanda vipya 8,477 vimejengwa na kuchangia kuzalisha ajira mpya 482,601,” amesema.
Akizungumzia mchango wa sekta ya viwanda katika pato la Taifa, Waziri Mkuu amesema sekta hiyo imeendelea kukua mwaka hadi mwaka ambapo kwa mwaka 2019 ilikua kwa asilimia 8.5 ikilinganishwa na asilimia 8.05 mwaka 2018, sawa na ongezeko la asilimia 0.45.
“Mchango huo unakwenda sambamba na kuimarika kwa uzalishaji wa bidhaa za viwandani. Kwa mfano, mwaka 2019 bidhaa za viwanda zilikuwa na thamani ya shilingi trilioni 10.2 ikilinganishwa na shilingi trilioni 9.6 mwaka 2018 sawa na ukuaji wa asilimia 5.8,” amesema.
“Maendeleo ya uwekezaji katika
sekta ya viwanda tunayoyashuhudia hivi sasa hapa nchini, yameongeza uzalishaji wa
bidhaa mbalimbali zikiwemo za chuma, saruji, vigae, nguo na mavazi, ngozi na
bidhaa za ngozi, kusindika nyama, chakula, mbogamboga na matunda, maziwa, mafuta ya kula, sukari,
vifungashio, mbolea, dawa za binadamu, sabuni na sigara pamoja na ubanguaji wa korosho,"amefafanua. 
Waziri Mkuu wa Jamhuri ya Muungano wa Tanzania, Kassim Majaliwa akipanda mti wa kumbukumbu baada
ya kuweka jiwe la msingi la kiwanda cha samani kinachomilikiwa na
Kampuni ya Orascom Construction and Engineering katika Kijiji cha
Namkonjera wilayani Ruangwa leo. Picha na OWM.
Awali Naibu Waziri wa Kilimo, Omar Mgumba amesema uwekaji wa jiwe la msingi katika kiwanda hicho cha kutengeneza samani, ni matokeo ya msisitizo wa Rais Dkt. John Magufuli na usimamizi wa karibu wa Waziri Mkuu mwenyewe kama sehemu ya utekelezaji wa Ilani ya CCM.
Amesema, Serikali imepania kuongeza uzalishaji wa zao la korosho ifikapo mwaka 2025. “Wenye viwanda vyote vya korosho, nawahakikishieni kwamba tutakuwa na malighafi za kutosha, tumepanga kuongeza uzalishaji kutokatani 300,000 hadi tani milioni moja ifikapo mwaka 2025,”alisema.
Mkuu
wa Wilaya ya Ruangwa,Hashim Mgandilwa amesema anawashukuru na kuwapongeza
Orascom kwa uamuzi wao wa kujenga kiwanda cha samani na cha kubangua korosho
kwani utakuwa na manufaa ya kiuchumi na kielimu.
“Ninawakumbusha wawekezaji hawa waweke kipaumbele katika kurudisha sehemu ya mapato yao kwa jamii,” alisisitza.
Naye Mkurugenzi
Mtendaji wa kiwanda hicho,Magira Masegesa amesema, kiwanda hicho
kinamilikiwa na kampuni ya wazawa ya Orascom Construction and
Engineering Company
(T) Ltd ikishirikiana na kampuni
tanzu ya Yukos Entreprises yenye
makao makuu jijini Dar es Salaam na kimeajiri wafanyakazi 150 ambao
wanatengeneza samani zenye ubora kwa bei nafuu.
Wafanyakazi wa Kiwanda cha Samani kinachomilikiwa na Kampuni
ya Orascom Construction and Engineering katika kijiji cha Namkonjera
wilayani Raungwa wakiranda mbao, Agosti 16, 2020 wakati Waziri Mkuu,Kassim Majaliwa alipoweka jiwe la Msingi la Kiwanda hicho.Picha na OWM.
“Jumla ya shilingi bilioni 5 zimewekezwa katika kiwanda hiki kwenye awamu ya kwanza na zinahusisha ununuzi wa malighafi, mitambo ya kisasa ya kuvuna, kupakia na kupakua malighafi porini, kuchakata magogo na kutengeneza samani kiwandani. Kiwanda hiki kina uwezo wa kuchakata magogo yenye ujazo wa mita 10,000 kwa mwaka,” alisema.
Amesema kiwanda cha ubanguaji wa korosho kinachotarajiwa kujengwa, nacho pia kitawekezwa sh. bilioni 5 zikiwa ni mtaji katika awamu ya kwanza.