Waziri Mkuchika aitaka TAKUKURU kuhakikisha wananchi wanapata haki pindi wanapopokea huduma

 TAASISI ya Kuzuia na Kupambana na Rushwa (TAKUKURU) imetakiwa kuhakikisha wananchi wanapata haki wanazostahili popote pale wanapoenda kupata huduma nchini, iwe ni kwenye taasisi za umma au binafsi, anaripoti James K.Mwamyoto kutoka Namtumbo.

Agizo hilo limetolewa wilayani Namtumbo jana na Waziri wa Nchi, Ofisi ya Rais, Menejimenti ya Utumishi wa Umma na Utawala Bora Kapteni Mstaafu George Huruma Mkuchika wakati akizindua jengo la Ofisi ya TAKUKURU Wilaya ya Namtumbo mkoani Ruvuma.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Kapteni Mstaafu Mheshimiwa George Huruma Mkuchika akizungumza na wananchi wa Wilaya ya Namtumbo (hawapo pichani) kabla ya kuzindua jengo la ofisi ya TAKUKURU la wilaya hiyo Agosti 19, 2020. Picha na Ofisi ya Rais, Menejimenti ya Utumishi wa Umma na Utawala Bora/Diramakini.

Mheshimiwa Mkuchika amefafanua kuwa, TAKUKURU inatakiwa kuwajengea wananchi imani ya kiutendaji ili pale inapotokea wananyang’anywa haki zao na mtu au taasisi yoyote kwa njia za rushwa, TAKUKURU ndio iwe ni kimbilio lao huku wakiwa na imani kuwa watasaidiwa ipasavyo na taasisi hiyo.

“Nawasihi, endeleeni kuwang’ata wala rushwa na mafisadi wote ili mradi msimuonee au kumpendelea yeyote, na endeleeni kuifanya haki ndio nguzo ya utendaji kazi wenu wa kila siku,” Mheshimiwa Mkuchika alihimiza.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Kapteni Mstaafu Mheshimiwa George Huruma Mkuchika akikata utepe kuzindua jengo la Ofisi ya TAKUKURU Wilaya ya Namtumbo, Agosti 19, 2020. Wa kwanza kushoto ni Mkuu wa Mkoa wa Ruvuma, Mheshimiwa Christina Mndeme na kulia ni Kaimu Mkurugenzi wa TAKUKURU, Bibi Sabina Seja.Picha na Ofisi ya Rais, Menejimenti ya Utumishi wa Umma na Utawala Bora/Diramakini.

Awali, Kaimu Mkurugenzi Mkuu wa TAKUKURU, Bibi Sabina Seja akitoa maelezo kuhusu jengo hilo alisema, uzinduzi wa jengo la TAKUKURU Wilaya ya Namtumbo ni ushaidi tosha kuwa Serikali inayoongozwa na Mheshimiwa Rais Dokta John Pombe Joseph Magufuli imeonesha nia na dhamira ya dhati ya kukabiliana na vitendo vya rushwa, ubadhirifu wa mali za umma nchini.

Bibi Seja, amemtibitishia Mheshimiwa Mkuchika kuwa, Watumishi wa TAKUKURU wilayani Namtumbo watatumia jengo la ofisi hiyo kuhakikisha wanapambana na vitendo vya rushwa, ufisadi na ubadhirifu kwa manufaa ya wananchi na maslahi ya taifa.

Kaimu Mkurugenzi wa TAKUKURU, Bibi Sabina Seja akitoa maelezo    kwa Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Kapteni Mstaafu Mheshimiwa George Huruma Mkuchika kuhusu jengo la Ofisi ya TAKUKURU Wilaya ya Namtumbo kabla ya Waziri huyo kulizindua rasmi Agosti 19, 2020.Picha na Ofisi ya Rais, Menejimenti ya Utumishi wa Umma na Utawala Bora/Diramakini.

Mheshimiwa Mkuchika amezindua jengo hilo la TAKUKURU Wilaya ya Namtumbo, ikiwa ni sehemu ya utekelezaji wa agizo la Rais wa Jamhuri ya Muungano wa Tanzania, Mheshimiwa Dokta John Pombe Joseph Magufuli ambaye tangu aingie madarakani amefanya kazi kubwa ya kuimarisha na kuendeleza mapambano dhidi ya rushwa na ufisadi nchini.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Kapteni Mstaafu Mheshimiwa George Huruma Mkuchika akiwa katika picha ya pamoja na Watumishi wa TAKUKURU mara baada ya kuzindua jengo la Ofisi ya TAKUKURU Wilaya ya Namtumbo, Agosti 19, 2020. Kulia kwake ni Mkuu wa Mkoa wa Ruvuma, Mheshimiwa Christina Mndeme na kushoto kwake ni Kaimu Mkurugenzi wa TAKUKURU, Bibi Sabina Seja.Picha na Ofisi ya Rais, Menejimenti ya Utumishi wa Umma na Utawala Bora/Diramakini.

Karibu! Tovuti hii ya www.diramakini.co.tz imesajiliwa rasmi na Mamlaka ya Mawasiliano Tanzania (TCRA) na kupewa leseni namba TCRA/OCS-BL/0197/2020 chini ya Diramakini Business Limited iliyosajiliwa nchini Tanzania kwa ajili ya kukuhabarisha, kukuelimisha na kukupasha habari mbalimbali toka ndani na nje ya nchi. Je? Una habari,maulizo au tangazo, unataka kutupa ufadhili? Tuwasiliane; diramakini@gmail.com Asante.