World Islamic Call Society yaazimia kuendelea kuwasaidia Watanzania wote

JUMUIYA ya Walinganiaji Dini ya Kiislam Duniani (World Islamic Call Society) imesema itaendelea na mpango wake wa kusaidia makundi mbalimbali ya kijamii ikiwemo walemavu, vikongwe pamoja na maskini wasiojiweza nchini Tanzania, anaripoti FATMA ALLY,www.diramakini.co.tz

Kauli hiyo imetolewa na Mkurugenzi wa jumuiya hiyo Tanzania, Ahmad Mus hab Almajlubu wakati alipokuwa akizungumza na waandishi wa habari jijini Dar es Salaam ambapo amesema jumuiya hiyo kwa sasa imerudi rasmi.

Mkurugenzi wa Jumuiya ya World Islamic Call Society, Ahmad Mus hab Almajlubu (wa tatu kutoka kushoto mstari wa nyuma) akiwa katika picha ya pamoja na baadhi ya walemavu waliopatiwa msaada wa vifaa jijini Dar es Salaam. Picha na FATMA ALLY/www.diramakini.co.tz

Amesema kuwa, jumuiya hiyo imejikita zaidi katika kusaidia watu mbalimbali wenye uhitaji maalum ambao wamekuwa na maisha duni kwa kuwachimbia visima vya maji safi na salama, kujenga nyumba za ibada, madarasa pamoja na kutoa elimu ya lugha ya Kiarabu.

"Jumuiya hii imeanzishwa mwaka 1984 na makao makuu yake yanapatikana mjini Tripol nchini Libya ambapo imejikita zaidi kuisaidia jamii katika kuwaendeleza kielimu kwa kutoa elimu ya ufundi (kushona) pamoja na kompyuta,"amesema Ahmad.

Aidha, amesema mbali na kutoa misadaa hiyo, lakini pia imekuwa na utaratibu wa kuwapeleka nje wanafunzi bure waliomaliza kidato cha nne na sita kwa lengo la kujiendeleza na elimu ya juu ili kujikwamua kimaisha.

Mkurugenzi wa Jumuiya ya World Islamic Call Society,Ahmad Mus hab Almajlubu (wa nne kutoka kulia) akiwa katika picha ya pamoja baada ya msaada wa vifaa kwa walemavu jijini Dar es Salaam leo. Picha na FATMA ALLY/www.diramakini.co.tz

 

Ameongeza kuwa, mpaka sasa wametoa misaada ya kuchimba visima, kutoa vifaa vya walemavu, kujenga misikiti katika mikoa ya  Dar es Salaam,Dodoma pamoja na Zanzibar.

"Licha ya mikoa hiyo, lakini pia tumekuwa na utaratibu wa kufururisha katika mikoa mingine pamoja na kutoa vifaa mbalimbali vya shule na madrasa sambamba kuitafsiri  Quran kwa lugha mbalimbali ikiwemo Kiswahili,"amesema Ahmad.