NA MWANDISHI DIRAMAKINI
Mheshimiwa Tundu Antipas Lissu ambaye alikuwa mgombea urais katika Uchaguzi Mkuu wa 2020 kwa tiketi ya Chama cha Demokrasia na Maendeleo (CHADEMA) ametua jijini Nairobi nchini Kenya kikazi.
Lissu ambaye ni Makamu Mwenyekiti wa CHADEMA Tanzania Bara amewasili nchini Kenya akitokea Ubelgiji.
Kwa mujibu wa taarifa za awali, zimeidokeza DIRAMAKINI Blog kuwa, Mheshimiwa Tundu Antipas Lissu kupitia ujio huo kesho ya Juni 25, 2021 anatarajiwa kufanya uzinduzi wa kitabu chake.
Chanzo hicho kimeieleza DIRAMAKINI Blog kuwa, kitabu hicho kimepewa jina Remaining in the Shadows:Parliament and Accountability in East Africa.
Mbunge huyo wa zamani wa Singida Mashariki na Mwanasheria mahiri, alielekea nchini Ubelgiji mwaka 2018 kwa ajili ya matibabu baada ya kunusurika kifo kutokana na kupigwa risasi 16 mwishoni mwa mwaka 2017 jijini Dodoma na watu wasiojulikana.
Kabla ya kwenda nchini Ubelgiji kwa ajili ya matibabu taratibu zilifanyika nchini Tanzania na kupelekwa hospitalini jijini Nairobi, ndipo safari ya kwenda kutafuta matibabu zaidi iliendelea huko Ubelgiji.
Tags
Habari