Wataalam wa ustawi wa jamii na saikolojia kutoka Taasisi ya Ustawi wa Jamii wapiga kambi Soko la Karume

NA MWANDISHI MAALUM-ISW

TIMU ya wataalam wa ustawi wa jamii na saikolojia kutoka Kituo cha Elimu, Ushauri na Msaada wa Kisaikolojia kilichopo chini ya Taasisi ya Ustawi wa Jamii imepiga kambi Ilala, Dar es Salaam kutoa huduma ya elimu, ushauri na msaada wa kisaikolojia.

Msaikolojia kutoka Kituo cha Elimu na Ushauri Taasisi ya Ustawi wa Jamii, Dkt. Zainab Rashid akitoa huduma kwa mfanyabaishara mlemavu, Bw. Jamal Nassoro Lemu wa soko la Mchikichini Ilala ambapo huduma ya elimu na ushauri inatolewa kwa wafanyabiashara wahanga wa moto sokoni hapo hasa wale wenye mahitaji maalum. (Picha na Ofisi ya Uhusiano -ISW). 

Huduma hiyo inatolewa bure kwa wafanyabiashara wa soko la Mchikichini maarufu Karume, hususani waliopo katika kundi maalum, ambao ni wahanga wa janga la moto lilitokea Januari 16, mwaka huu.

Mratibu wa kituo hicho cha elimu na ushauri, Bi. Rufina Khumbe amesema Taasisi ya Ustawi wa Jamii iliona ni vyema kwenda kutoa huduma hiyo kwa waathirika wa janga hilo ambao wanauhitaji mkubwa kwa wakati huu. 

Banda la Kituo cha Elimu Ushauri na Msaada wa Kisaikolojia cha Taasisi ya Ustawi wa Jamii lililopo katika uwanja wa ukumbi wa Jiji Ilala ambapo huduma ya ushauri na elimu inatolewa bure kwa wafanyabiashara wahanga wa moto uliotokea soko la Mchikichini Karume Ilala jijini Dar es Salaam. (Picha na Ofisi ya Uhusiano -ISW). 

“Taasisi imekuwa ikitoa huduma kwa kushirikiana na wadau mbalimbali ili kuhakikisha tunastawisha jamii yetu, kwa kutatua changamoto mbalimbali pia kama taasisi mama chini ya Wizara ya Maendeleo ya Jamii, Jinsia, Wanawake na Makundi Maalum tumeguswa, na ni jukumu la kituo chetu cha ushauri kuja kutoa huduma ya elimu hii na ushauri ili wafanyabiashara hawa hasa wenye uhitaji waweze kulipokea hilo na kulikubali kama changamoto” amesema.

Bi. Rufina ameongeza kuwa, kutokana na janga hilo la moto wengi wao wamekata tamaa ya maisha, kwa sababu mali zilizokuwa zinawaingizia kipato na mitaji vimeteketea na moto huku wengine walichukua mikopo ili kukuza na kuanzisha biashara.

"Mali zimeteketea na hawajui wanalipaje hiyo mikopo. Ndio maana taasisi ikaona ni vyema kuongea na wafanyabiashara hawa ili kuwapa tumaini tena la maisha yao," amesema Bi. Rufina. 

Kutoka Kushoto mwenyekiti wa wafanyabiashara walemavu soko la mchikichini Mzee Juma Hamis akisikilizwa kwa umakani mkubwa na maafisa ustawi wa jamii, Rukia Mwinyi kutoka Kituo cha Elimu, Ushauri, na Msaada wa Kisaikolojia (Taasisi ya Ustawi wa Jamii) pamoja na Bi. Lilian Chilo Afisa Ustawi wa Jamii kutoka Ofisi ya Jiji la Dar es Salaam. (Picha na Ofisi ya Uhusiano -ISW). 

Kwa upande wake msaikolojia kutoka Kituo hicho, Dkt.Zainabu Rashidi amesema, “tunatoa elimu juu ya kujikinga na majanga mbalimbali ikiwa ni pamoja na moto, mafuriko na pia tunatoa elimu ya namna ya kuyakubali na kuishi na majanga na matatizo baada ya kutokea”.

Aidha, Dkt. Zainabu amesema watu wengi wanajua wakifika katika banda la Taasisi ya Ustawi wa Jamii (kituo cha elimu shauri na msaada wa kisaikolojia) watapata msaada wa fedha kwa ajili ya mitaji yao ya biashara. 

“Jamii yetu haina uelewa juu ya umuhimu wa huduma ya ushauri na msaada wa kisaikolojia kama tiba ya namna ya kupata suluhu ya matatizo yao kwa kuzungumza na wataalam. Jamii haiamini katika ushauri pekee hivyo tuko hapa ili kuondoa hiyo dhana,” amesema Bi. Zainabu.

Maria Mayanzini afisa ustawi wa Jamii wa Kituo cha Elimu na Ushauri na Msaada wa Kisaikolojia – Taasisi ya Ustawi wa Jamii akimsikiliza kwa makini mmoja wa wafanya biashara waliofika kupata huduma katika banda la kituo cha elimu na ushauri cha Taasisi ya Ustawi wa Jamii.(Picha na Ofisi ya Uhusiano -ISW). 

Kwa upande wake Mwenyekiti wa Chama cha Wafanyabiashara wenye ulemavu soko la Mchikichini (Karume), mzee Juma Hamisi amesema anashukuru Taasisi ya Ustawi wa Jamii kwa elimu,ushauri na msaada wa kisaikolojia.

“Tumepokelewa vizuri tumepata msaada wa ushauri wa kisaikolojia na elimu na tumewasikia, elimu hii inatupa ujasiri na tumejua kuwa janga hili lililotupata sio letu tu bali ni letu sote,” amesema mzee Juma na kuongeza:

“Naishukuru serikali ya awamu ya sita kupitia Wizara ya Maendeleo ya Jamii, Jinsia, Wanawake na Makundi maalumu kwa kusikia sauti yetu na kuja kutupa msaada wa kisaikolojia na ushauri”.

Mratibu wa Kituo cha Elimu, Ushauri na Msaada wa Kisaikolojia, Bi Rufina Khumbe akimhudumia mfanyabiashara wa bajaj eneo la soko la Mchikichini, Bi. Ashura Sadiki katika uwanja wa ukumbi wa jiji Ilala Dar es salaam. (Picha na Ofisi ya Uhusiano-ISW). 

Zaharan Sulemani mfanyabiashara wa leso, soksi na madaftari katika soko hilo ametoa shukrani kwa taasisi na kusema kuwa elimu hiyo imewapa ujasiri wa kuanza upya.

“Tunashukuru Taasisi ya Ustawi wa Jamii kwa kuja kutoa elimu, ushauri na msaada wa kisaikolojia kwa wahanga wa janga la moto pia namshukuru mama Samia Suluhu Hassan kwa kutuweka sisi wamachinga kwenye kundi maalumu chini ya Wizara hii ya Maendeleo ya Jamii, Jinsia, Wanawake na Makundi Maalum kwani tunaaini tutapata usaidizi na usimamizi wa karibu zaidi utakaotufaidisha katika biashara tunazofanya,”amesema.

Pia Jumanne Kongogo Mwenyekiti wa Jumuiya ya Wafanyaniashara sokoni hapo ametoa wito kwa wafanyabiashara wa soko la Karume kwenda kupata huduma hiyo ya elimu na ushauri kwenye banda la Taasisi ya Ustawi wa Jamii.

Baadhi ya wafanyabiashara waliofika kwenye uwanja wa ukumbi wa jiji Ilala soko la Mchikichini kupata huduma ya ushauri na elimu kutoka kwa maafisa ustawi wa jamii wa Kituo cha Elimu na Ushauri cha Taasisi ya Ustawi wa Jamii na Jiji la Dar es salaam. (Picha na Ofisi ya Uhusiano -ISW).

Ameiomba Serikali iangalie jinsi itakavyo jenga soko ambalo miundombinu yake itakidhi kwa wafanyabiashara wenye uhitaji maalumu.

Naye mratibu wa huduma za ustawi wa Jamii kutoka Mkoa, Afisa Ustawi wa Jamii kutoka Jiji la Dar es Salaam Bi. Lilian Chilo ametoa wito kwa wafanyabiashara wa soko la Mchikichini kujitokeza kupata huduma inayoendelea kutolewa katika uwanja wa ukumbi wa jiji Ilala kwa siku kumi na nne (14) ambapo huduma hiyo ilianzia katika viwanja vya mnazi mmoja. 

Taasisi ya Ustawi wa Jamii chini ya Wizara mpya ya Maendeleo ya Jamii, Jinsia, Wanawake na Makundi Maalum inaunga mkono jitihada za Mheshimiwa Rais Samia Suluhu Hassan kutambua wamachinga kama kundi maalum, pamoja na makundi mengine katika jamii yetu. 

Zaidi kwa kutoa kipaumbele na umuhimu wa pekee kwa makundi haya kupata huduma za Ustawi wa Jamii ili kuinua na kuboresha hali zao maisha na hasa pindi kunapotokea majanga mbalimbali kama hili la moto katika soko la Mchikichini Karume. 

Taasisi ya Ustawi wa Jamii itaendelea kutoa ushauri wa kitaaluma na ushauri nasaha na msaada wa kisaikolojia kwa jamii ya watanzania na makundi maalum kama sehemu ya jukumu lake la kutoa ‘’Ushauri Weledi, katika fani bobezi".