NA MWANDISHI DIRAMAKINI
KLABU ya Yanga imeondoka na alama tatu huku ikiwapa kichapo cha mabao 2-0 wenyeji Coastal Union.
Mtanange huo wa Ligi Kuu ya NBC umepigwa katika dimba la Mkwakwani jijini Tanga leo Januari 16,2022.
Fiston Mayele dakika ya 40 ambaye alimalizia krosi iliyopigwa na beki Djuma Shabani na Said Ntibanzokiza dakika ya 89 ambaye alimalizia pasi kutoka kwa Farid Mussa ndio walioharibu mipango ya wenyeji hao.
Kwa matokeo hayo Yanga inaendelea kuwa nafasi ya kwanza kwenye msimamo wa Ligi Kuu ya NBC baada ya kucheza mechi 12 ikiwa na alama 32.
Wakati huo huo, tayari Yanga imemtambulisha winga Mkongo, Chico Ushindi Wa Kubanza kutoka klabu ya TP Mazembe kuwa mchezaji wake mpya wa sita kupitia usajili wa dirisha dogo ambalo limefungwa saa 6:00 usiku wa kuamkia leo.
Awali walisajiliwa wageni watano ambao ni kipa Abdultwalib Mshery, beki Ibrahim Abdallah Hamad kutoka KMKM ya Zanzibar, kiungo Salum Abubakar (Sure Boy) kutoka Azam FC, winga Dennis Nkane kutoka Biashara United na mshambuliaji Crispin Ngushi kutoka Mbeya Kwanza.
Wakati huo huo, Yanga imemtambulisha Mbrazil, Milton Nienov kuwa kocha wake mpya wa makipa katika klabu hiyo.