Italia yaonesha ishara njema kwa maendeleo ya Zanzibar

NA MWANDISHI DIRAMAKINI

RAIS wa Zanzibar na Mwenyekiti wa Baraza la Mapinduzi, Mheshimiwa Dkt.Hussein Ali Mwinyi ameupongeza utayari wa Serikali ya Italia kuunga mkono juhudi za Serikali ya Mapinduzi ya Zanzibar katika utekelezaji wa mipango yake ya maendeleo.

Rais Dkt. Mwinyi amesema hayo leo Februari 22, 2022 Ikulu jijini Zanzibar katika mazunguzo kati yake na Balozi wa Italia nchini Tanzania, Marco Lombardi.

Katika mazungumzo hayo, Rais Dkt.Mwinyi amepongeza azma ya Serikali ya Italia ya kushirikiana na Zanzibar katika kuhakikisha inaimarisha sekta zake za maendeleo ikiwemo sekta ya utalii ambapo nchi hiyo ni mdau mkubwa.

Rais Dkt.Mwinyi amesema kuwa, Zanzibar kwa kipindi kirefu imekuwa ikinufaika kutokana na kuwepo kwa idadi kubwa ya wawekezaji na wageni kutoka nchi ya Italia.

Aidha, Rais Dkt.Mwinyi amemuahidi Balozi Lombardi kwamba Serikali ya Mapinduzi ya Zanzibar itaendelea kuweka mazingira mazuri katika kuhakikisha wawekezaji na wageni wanaotoka nchi hiyo pamoja na nchi nyingine duniani wanatekeleza shughuli zao katika mazingira yanayokidhi matarajio yao.

Awali Balozi wa Italia nchini Tanzania, Marco Lombardi alimueleza Rais Dkt. Mwinyi kwamba Serikali ya Italia inaziona juhudi zinazochukuliwa na Serikali ya Mapinduzi ya Zanzibar hivyo, iko tayari kuendelea kuziunga mkono.

Balozi Lombardi amemuhakikishia Rais Dkt. Mwinyi kwamba Italia itaendelea kushirikiana na Serikali ya Mapinduzi ya Zanzibar katika kuhakikisha sekta ya utalii inaimarika hapa nchini.

Katika kuhakikisha azma hiyo inafikiwa, Balozi Lombardi alimueleza Rais Dkt.Mwinyi azma ya ubalozi huo kufanya kongamano kubwa la biashara mwezi Septemba mwaka huu 2022 hapa Zanzibar ili kujadili fursa mbalimbali za uchumi zilizopo.

Aidha, alimueleza Rais Dkt.Mwinyi azma ya kampuni kubwa za nchi hiyo kufanya safari zake za ndege moja kwa moja na sio zile za msimu kama ilivyo kwa hivi sasa hatua ambayo itaimarisha zaidi sekta ya utalii na biashara.

Sambamba na hayo, Balozi huyo wa Italia alimueleza Rais Dkt. Mwinyi mikakati iliyoiweka katika kuanzisha vyuo vya ufundi hapa hapa Zanzibar ambavyo, pamoja na mambo mengine, vitasaidia katika kuimarisha sekta ya utalii.

Balozi Lombardi alimuhakikishia Rais Dkt. Mwinyi kwamba Serikali yake itaiunga mkono Sera ya Uchumi wa Buluu ili kuhakikisha Zanzibar inapiga hatua na kufikia malengo iliyojiwekea.