NA MWANDISHI DIRAMAKINI
TIMU Soka a Ruvu Shooting ya Kibaha mkoani Pwani imetamba kuifunga timu ya Dodoma Jiji kwenye mchezo wa wa Ligi Kuu ya NBC utakaofanyika kwenye uwanja wa Mabatini Ruvu Mlandizi.
Wakizungumza na waandishi wa habari kwenye uwanja huo, mwalimu na nahodha wa timu hiyo wamesema wamejipanga vema kushinda mchezo huo.
Mwalimu msaidizi wa Ruvu Shooting, Rajab Nakuchema amesema mchezo huo ni mgumu, lakini watatumia vyema uwanja wao wa nyumbani kupata alama tatu ambazo kwao ni muhimu.
Nakuchema amesema kuwa, timu ina morali ya hali ya juu kwani wanacheza wakiwa nyumbani na ushindi kwao ni muhimu.
Nahodha wa Ruvu Shooting, Renatus Kisase amesema, kwa sasa wako vizuri na watafanya vizuri kwenye uwanja wao wa nyumbani ambao hawajautumia kwa muda kupisha marekebisho.Naye Mwalimu Mohamed Muya wa Dodoma Jiji amesema kuwa, anatarajia mchezo huo kuwa mgumu lakini wana uhakika wa ushindi kwani ushindi kwao utawaweka kwenye nafasi nzuri ya msimamo wa ligi.
Naye Katibu wa Chama cha Soka Mkoa wa Pwani (COREFA),Mohamed Masenga amesema katika mapambano ya ugonjwa wa UVIKO-19 watachukua tahadhari zote na zoezi la uchanchaji litafanyika uwanjani hapo ambapo washabiki 20 wa kwanza kuchanja wataingia uwanjani bure.
Amesema kuwa, Wizara ya Afya kwa kushirikiana na Shirikisho la Soka Tanzania (TFF) katika kupambana na ugonjwa huo watatoa elimu ya namna ya kujikinga na ugonjwa huo kupitia kauli mbiu ya ujanja ni kuchanja sasa ni zamu yetu.
Tags
Michezo