NA MWANDISHI DIRAMAKINI
YANGA SC wameuanza vyema mzunguko wa pili wa Ligi Kuu ya NBC ya Tanzania Bara baada ya ushindi wa 3-0 dhidi ya Kagera Sugar.
Ni kupitia mtanange uliopigwa leo Februari 27,2022 katika dimba la Benjamin Mkapa lililopo Halmashauri ya Manispaa ya Temeke mkoani Dar es Salaam.
Mshambuliaji Fiston Kalala Mayele alichomeka mabao mawili dakika ya 30 na 50 na kiungo Saido Ntibanzokiza dakika ya 64 alifunga hesabu.
Matokeo hayo yanaifanya Yanga SC kufikisha alama 42 katika mchezo wa 16 wakiwa na ziada ya alama 11 mbele ya watani wao Simba SC.
Awali Tanzania Prisons na Mbeya City ziligawana alama baada ya sare ya 1-1 katika mchezo wa Ligi Kuu ya NBC Tanzania Bara.
Ni mtanange uliopigwa katika dimba la Sokoine jijini Mbeya ambapo Adili Buha alianza kuifungia Prisons dakika ya saba, kabla ya Ssemuju Joseph kuisawazishia Mbeya City dakika ya 86.
Wakati huo huo wenyeji, Ruvu Shooting wamelazimishwa sare ya 1-1 na Dodoma Jiji FC Uwanja wa Mabatini uliopo Mlandizi mkoani Pwani.
Waziri Junior alianza kuifungia Dodoma Jiji dakika ya 11, kabla ya Abrahman Mussa kuisawazishia Ruvu Shooting dakika ya 58.
