NA OR-TAMISEMI
HALMASHAURI ya Wilaya ya Same mkoani Kilimanjaro imekamilisha ujenzi wa Jengo la Huduma za Wagonjwa wa Dharura lililojengwa katika hospitali ya wilaya hiyo
Jengo hilo lililogharimu shilingi milioni 300 limejengwa kwa fedha kutoka Serikali Kuu na ni miongoni mwa majengo ya wagonjwa wa dharura 80 yaliyojengwa katika vituo vya kutolea huduma katika maeneo mbalimbali nchini.
Akizungumzia ukamilishaji wa jengo hilo, Mganga Mkuu wa Wilaya ya Same, Dkt. Alex Philemon amesema, kuanzia mwaka 2023 wananchi wa Same na maeneo ya jirani wataanza kufaidika na huduma za dharura.
Naye Mganga Mfawidhi wa Hospitali ya Wilaya ya Same, Dkt.Ibrahimu Sembua amesema, hapo awali walikuwa wanatoa huduma za dharura kwenye jengo la wagonjwa wa nje ambapo huduma hiyo haikuwa inatolewa kwa mpangilio mzuri, lakini kwa upatikanaji wa jengo hilo huduma zitakuwa za uhakika.
Naye Afisa Muuguzi wa Hospitali ya wilaya hiyo, Azania Thabiti amesema, Wilaya ya Same ipo kwenye barabara kuu ambapo ajali hutokea mara kwa mara na walikuwa wanaletwa katika hospitali hiyo kwa kuwa hapakuwa na jengo hilo iliwalazimu kuwapeleka Mawenzi au KCMC, lakini kwa sasa watawahudumia katika jengo hilo.