NA DIRAMAKINI
RAIS wa Jamhuri ya Kenya, Mheshimiwa William Ruto amesema hatakubali utovu wa nidhamu huku akisisitiza utii wa sheria bila shuruti nchini humo.
Amesema, Kenya itaongozwa na utawala wa sheria na kila mtu lazima afanye kazi kwa kuzingatia Katiba. "Hakuna kisicho cha kisheria kitakachokuwa sehemu ya kile tunachofanya kama Taifa," alisema."Tunapofurahia haki zetu kama watu binafsi, ni lazima tuwe waangalifu ili kuhakikisha kwamba hatukanyagi haki za wengine."
Mheshimiwa Rais Ruto ameyasema hayo hivi karibuni katika Ikulu ya Nairobi, ambapo aliongoza hafla ya kuapishwa kwa Wakili Mkuu wa Serikali, Shadrack Mose.
Rais alisema ana imani kuwa Bw.Mose atatoa uongozi kulingana na uzoefu, ujuzi na uelewa wake wa sheria."Toa uongozi na uhakikishe kuwa Serikali inapata mwongozo sahihi wa kisheria ili kutekeleza majukumu yake," alifafanua. Alimuomba Mwanasheria Mkuu kutetea mfumo unaofaa wa kisheria ambao utaimarisha ushindani wa Kimataifa wa Kenya.
“Ni dhamira yetu kuhakikisha kwamba tunavutia uwekezaji wa moja kwa moja wa kigeni kadri tuwezavyo. Tunataka kukopa kidogo na kufanya zaidi kwa ajili ya nchi."
Rais alibainisha kuwa, mara tu Kenya itakapopata imani ya wawekezaji wa kimataifa, itajiondoa katika ukopaji usio wa lazima. Alimwambia Bw.Mose anapaswa kuhakikisha kuwa Serikali inapata uwakilishi bora wa kisheria katika hatua zote.