Serikali kuendelea kuimarisha mifumo ya usimamizi wa maafa nchini

DODOMA-Serikali kupitia Idara ya Menejimenti ya maafa Ofisi ya Waziri Mkuu Sera, Bunge na Uratibu imeendelea kuimarisha mifumo ya usimamizi wa masuala ya maafa nchini ili kuendelea kuwa na mikakati thabiti ya kukabiliana na maafa nchini.

Baadhi ya wajumbe wa Kamati ya Kudumu ya Bunge ya Hesabu za Serikali (PAC) wakifuatilia semina ya kujengewa uelewa kuhusu masuala ya Menejimenti ya maafa na mfuko wa Taifa wa Usimamizi wa Maafa nchini ulio chini ya Ofisi ya Waziri Mkuu Sera, Bunge na Uratibu.

Naibu Katibu Mkuu Ofisi ya Waziri Mkuu Sera, Bunge na Uratibu Bw. Anderson Mutatembwa akizungumza kuhusu masuala ya menejimenti ya maafa wakati wa semina ya wajumbe wa Kamati ya Kudumu ya Bunge ya Hesabu za Serikali (PAC) iliyolenga kujenga uelewa kuhusu masuala hayo pamoja na mfuko wa Taifa wa Usimamizi wa Maafa nchini.

Akizungumza wakati wa semina kwa wajumbe wa Kamati ya Kudumu ya Bunge ya Hesabu za Serikali (PAC) Naibu Katibu Mkuu wa ofisi hiyo Bw. Anderson Mutatembwa amesema kuwa tayari ofisi yake imeendelea kuratibu Mfumo Shirikishi wa kidigitali wa usimamizi wa taarifa za masuala ya maafa, uwepo wa Kituo cha Operesheni na Mawasiliano ya Dharura, uwepo wa vifaa vya misaada ya kibinadamu vinavyohifadhiwa kwenye maghala, utoaji wa elimu kwa umma pamoja na ujenzi wa kituo cha Usimamizi wa Maafa katika eneo la Nzuguni Dodoma.

Mkurugenzi Msaidizi Idara ya Menejimenti ya Maafa Ofisi ya Waziri Mkuu (Sera, Bunge na Uratibu) Bw. Charles Msangi akiwasilisha mada kuhusu masuala ya menejimenti ya maafa mbele ya wa Kamati ya Kudumu ya Bunge ya Hesabu za Serikali jijini Dodoma.

Akizungumzia maandalizi katika kuelekea mvua za el nino amesema kuwa, ofisi imeendela kuziwezesha kamati za maafa katika mikoa 14 iliyotabiriwa kupata athari za mvua hizo zilizotabiriwa na Mamlaka ya hali ya hewa nchini na kuzikumbusha kuendelea kujiimarisha katika maeneo yao ili kukabiliana na madhara yanayoweza kutokea wakati wa mvua hizo.

Mjumbe wa Kamati ya Kudumu ya Bunge ya Hesabu za Serikali Mhe.Bakar Bakar Hamad akichangia hoja wakati wa semina kuhusu masuala ya Menejimenti ya maafa iliyofanyika Bungeni Dodoma.

“Tumeshaifikia mikoa iliyotajwa kuathiriwa na mvua za el nino kwa kutoa elimu kwa kamati za maafa ngazi ya Mkoa hadi Vijiji lengo ni kuwajengea uelewa zaidi na kukumbusha jamii kuchukua hatua za mapema kabla ya kupata madhara ya uwepo wa mvua hizo,” alisema Mutatembwa.

Mjumbe wa Kamati ya Kudumu ya Bunge ya Hesabu za Serikali Mhe. Janeth Maurice akiuliza jambo wakati wa semina kuhusu masuala ya Menejimenti ya maafa iliyofanyika kwa lengo la kuwajengea uelewa.

Aidha akiwasilisha taarifa kuhusu dhana ya menejimenti ya Maafa na Mfuko wa Taifa wa usimamizi wa maafa nchini Mkurugenzi Msaidizi Idara ya Menejimenti ya maafa Bw. Charles Msangi ameeleza kuwa, Ofisi imeendelea kuimarisha mfumo wa mawasilino kupitia kituo cha operesheni na mawasiliano ya dharura ambacho kipo chini ya Ofisi hiyo kinachopokea taarifa za majanga kwa kupiga namba 190 au kuandika ujumbe kwenda namba *190# ok ambapo ofisi inapokea taarifa hizo na kuzifanyia kazi katika maeneo yote nchini.

Makamu Mwenyekiti wa Kamati ya Kudumu ya Bunge ya Hesabu za Serikali Mhe.Japhet Hasunga akiongioza kikao cha kamati hiyo, kilicholenga kujengewa uelewa kuhusu masuala ya menejimenti ya maafa na mfuko wa Taifa wa Usimamizi wa Maafa nchini chini ya Ofisi ya Waziri Mkuu Sera, Bunge na Uratibu Bungeni Dodoma.

Kwa upande wake Makamu Mwenyekiti wa Kamati hiyo Mhe.Japhet Hasunga ameipongeza Ofisi ya Waziri Mkuu kwa kuendelea kuratibu masuala ya maafa nchini huku akiwakumbusha kuongeza nguvu katika utoaji wa elimu kwa umma na kuwa na mifumo rahisi ya kuyafikia makundi yote nchini kuanzia ngazi ya Kijiji ili kuwa na uelewa wa pamoja juu ya masuala hayo.

“Endeleeni kutoa elimu kwa umma na kuikumbusha jamii kuchukua hatua hususan katika kipindi hichi kilichotabiriwa kuwepo na mvua za el nino nchini, pia ni wakati sasa wa serikali kuimarisha mawasiliano wakati wa maafa ili kuwa na jamii salama na stahimilivu dhidi ya madhara ya maafa,” alisisitiza Mhe. Hasunga.