GAZA-Ghasia zimeongezeka katika Ukingo wa Magharibi (West Bank) na Jerusalem Mashariki ambayo inadaiwa kukaliwa kwa mabavu tangu Israel itangaze vita vyake dhidi ya Hamas na kuendelea kushambulia Gaza wiki iliyopita.
Wapalestina wakitafuta majeruhi chini ya vifusi baada ya mashambulizi ya Israel, huku kukiwa na mzozo unaoendelea kati ya Israel na kundi la Kiislamu la Palestina Hamas, huko Khan Younis Kusini mwa Ukanda wa Gaza leo Oktoba 14, 2023. (Picha na Mohammed Salem/REUTERS).Idadi ya vifo ilipanda hadi 53, kulingana na Wizara ya Afya ya Palestina katika taarifa yake leo Jumamosi asubuhi, wakati zaidi ya watu 1,100 wamejeruhiwa.
Walowezi, kwa mujibu wa sheria za kimataifa, ni raia wa Israel wanaoishi katika makazi haramu katika Ukingo wa Magharibi na wanatuhumiwa kwa kutekeleza vitendo vya unyanyasaji, mashambulio ya kimwili, uharibifu wa mali, na unyanyasaji dhidi ya Wapalestina.
Aidha,Wizara ya Afya ya Palestina ilisema kuwa, mwanamume wa Kipalestina mwenye umri wa miaka 27 aliuawa kwa kuchomwa moto na Israel huko Jeriko, katika Ukingo wa Magharibi unaokaliwa kwa mabavu. Alifika katika hospitali ya Serikali ya Yeriko akiwa na jeraha la risasi kichwani, kulingana na Wizara ya Afya.
Mapigano kati ya Wapalestina na wanajeshi wa Israel yalizuka katika maeneo kadhaa katika Ukingo wa Magharibi unaokaliwa kwa mabavu huku kukiwa na hatua kadhaa zilizochukuliwa na jeshi kufuatia shambulizi la Hamas Jumamosi.
Kwa mujibu wa CNN, miongoni mwa hatua hizo ni ufungaji wa maeneo ambao unajumuisha vituo vya ukaguzi na vizuizi vya barabarani vilivyowekwa na Jeshi la Israeli katika sehemu tofauti za kuingia na kutoka.
Sambamba na kuweka mipaka ya harakati za Wapalestina ndani ya Ukingo wa Magharibi na kati ya Ukingo wa Magharibi na Israel, kulingana na wakaazi kadhaa wa Palestina waliozungumza na CNN siku ya Jumatano.
Wapalestina wanaoishi katika Ukingo wa Magharibi waliiambia CNN kufungwa huko kumeathiri sana maisha yao ya kila siku, na kuzuia uwezo wao wa kusafiri kwenda kazini, shuleni, matibabu, na shughuli zingine muhimu.
Msemaji wa Jeshi la Israel, Rear Admiral Daniel Hagari alisema, mapema wiki hii kwamba wanajeshi wako katika hali ya tahadhari katika Ukingo wa Magharibi, na kuongeza kuwa wanajiandaa kuzuia mashambulizi yoyote yanayoweza kutokea. (Agencies)