DAR ES SALAAM-Kocha Mkuu wa Simba, Roberto Oliviera ‘Robertinho’ amesema, kipigo cha mabao 5-1 walichopata kutoka kwa watani zao Yanga ni sehemu ya mpira.
Robertinho amesema, kipindi cha pili walipoteza umakini na kushindwa kuzuia nafasi ambazo wapinzani wao walizitumia vizuri. Robertinho amesema, hawakuwa vizuri wakati wanapopoteza mpira na wapinzani waliweza kuwasoma na kutumia madhaifu yao kuwa faida kwao.
“Nawapongeza wapinzani kwa ushindi hatukuwa vizuri hasa kipindi cha pili, lakini huu ni mpira na tunajipanga kwa mchezo ujao,” amesema Robertinho.
Katika mtanange huo, Klabu ya Simba ya jijini Dar es Salaam imejikuta katika wakati mgumu kupitia Derby ya Kariakoo baada ya kupoteza kwa mabao 5-1.
Mtanange huo umepigwa leo Novemba 5, 2023 dhidi ya watani zao Yanga SC ya jijini Dar es Salaam katika Dimba la Benjamin Mkapa lililopo Halmashauri ya Manispaa ya Temeke jijini Dar es Salaam.
Kupitia Derby hiyo, kikosi cha Yanga kilipata bao la mapema dakika ya tatu kupitia kwa Kennedy Musonda kwa baada ya kumalizia mpira wa krosi uliopigwa na Yao Attohoula.
Aidha, Kibu Denis aliwapatia Simba SC bao la kusawazisha kwa kichwa dakika ya tisa akimalizia mpira wa kona uliopigwa na Said Ntibazonkiza.
Max Nzengeli aliwapatia Yanga bao la pili dakika ya 64 kwa shuti kali la chini chini baada ya kuwazidi ujanja walinzi wetu wa Kati.
Aziz Ki aliwapatia Yanga bao la tatu dakika ya 72 baada ya kupokea pasi safi kutoka kwa Clement Mzize.
Nzengeli aliwapatia Yanga bao la nne dakika ya 77 akiwa ndani ya 18 baada ya kupokea pasi safi ya Mzize.Bao la tano kwa klabu ya Yanga lilipelekwa nyavuni na Pacome dakika ya 87 kwa mkwaju wa penalti.