JEDDAH-Uwezekano wa Saudi Arabia kuandaa Kombe la Dunia la Wanaume 2034 umeongezeka baada ya Shirikisho la Soka Australia (AFA) kujiondoa kwenye kinyang'anyiro cha zabuni.
Saudi Arabia ndiyo Taifa pekee lililowasilisha ombi la kuandaa Kombe la Dunia la FIFA la 2034 kabla ya tarehe ya mwisho kufungwa kwa zabuni, hiyo ikiwa ni kwa mujibu Shirikisho la Soka Duniani (Picha na Shirikisho la Soka la Saudia Arabia).Wakati FIFA siku ya Jumanne ikiwa ndiyo siku yao ya kupokea zabuni zilizowasilishwa, Saudi Arabia inaibuka kuwa mgombea pekee aliyetangazwa.
AFA katika taarifa yake ilitaja uzingatiaji wa kina wa sababu za uamuzi wake wa kutotoa zabuni kwa shindano la 2034.
Wakati idhini rasmi ya FIFA ya Saudi Arabia kama mwenyeji inasubiri hadi mwaka ujao, ushindi unaonekana kukaribia kwa Ufalme huo, kuashiria kufanikiwa kwa juhudi zake kuu za kuanzisha uwepo muhimu katika michezo ya kimataifa.
Mbio za uenyeji wa 2034 zilizokuwa zikifuatiliwa kwa kasi, ambazo ni za mashirikisho ya wanachama barani Asia na Oceania, zilianzishwa baada ya kutolewa kwa Kombe la Dunia la 2030 kwa zabuni ya pamoja na Uhispania, Ureno, na Morocco.
Shirikisho la Soka la Saudi lilitangaza mara moja kugombea, likipokea uungwaji mkono kutoka Shirikisho la Soka la Asia (AFC).
Awali Indonesia ilizingatia zabuni ya pamoja na Australia, pamoja na Malaysia na Singapore, lakini hatimaye iliunga mkono Saudi Arabia.
Lengo la Australia sasa linahamia katika kupata haki za kuandaa Kombe la Dunia la Klabu 2029 na Kombe la Asia la Wanawake 2026.
Wakati huo huo, Saudi Arabia, inayotarajiwa kuandaa Kombe la Asia kwa wanaume mwaka 2027 imeanzisha mpango kabambe wa ujenzi, kuendeleza na kukarabati viwanja kwa ajili ya maandalizi ya Kombe la Dunia.
Ikiwa na zaidi ya hafla 50 za kimataifa zenye mafanikio zilizoandaliwa tangu 2018, Saudi Arabia imepata kutambuliwa kama mwenyeji wa hafla kuu za kimataifa za michezo, kandanda,tenisi, farasi,gofu na mingineyo.
Jitihada za Ufalme kwa Kombe la Dunia la 2034 zimepata uungwaji mkono mkubwa, huku zaidi ya mashirikisho 100 ya kandanda kutoka mabara ya Kiarabu, Asia, na Afrika yakiahidi uungwaji mkono wao kamili.
Saudi Arabia inafanya kazi kwa bidii katika ujenzi wa viwanja kwa kuzingatia viwango vya FIFA, na kuhakikisha kiwango cha chini cha viti 40,000 kwa mashabiki.
Tayari Ufalme huo una viwanja viwili vya michezo vyenye uwezo wa kuzidi viti 62,000 na inapanga kujenga viwanja vya ziada huko Riyadh, Qiddiya, NEOM, Jeddah na Dammam.
Aidha, juhudi zinazoendelea ni pamoja na ukuzaji na uboreshaji wa viwanja vya michezo vya Riyadh, Jeddah, Dammam, Taif na Buraidah ili kufikia viwango vya FIFA kwa Kombe la Dunia. (SG/DIRAMAKINI)