NA DIRAMAKINI
MTOTO wa msanii wa Bongofleva, Rapa Shetta anayefahamika kwa jina la Qailah Nurdin Bilal amechaguliwa kuwa Mwenyekiti wa Chipukizi Taifa katika Chama Cha Mapinduzi (CCM).
Ushindi huo ameupata leo Desemba 20,2023 katika mkutano wa tisa wa Chipukizi Taifa uliofanyika katika ukumbi wa Jakaya Kikwete jijini Dodoma.
“Ndugu wajumbe majina niliyopewa na wazazi wangu bila kushirikishwa ni Qailah Nurdin Bilal. Ndugu wajumbe kabla sijawaomba kura naomba niwakumbushe kuwa zizi la ng’ombe hupendezeshwa kwa ndama wengi, sasa CCM ndiyo zizi la ng’ombe na ndama ndiyo chipukizi.
“CCM oyeee…,ndugu wajumbe nimesimama hapa ili niombe ridhaa yenu ya kunichagua, ikimpendeza Mungu niweze kuwa mwenyekiti wenu wa chipukizi Taifa.
“Ninaamini uwezo wa kunifanya mimi niwe Mwenyekiti wenu kwa utaratibu wa chama chetu kibali hicho mnacho ninyi,ndugu wajumbe niwaahidi mambo kadhaa endapo mtanipa ridhaa hii ya kuwa Mwenyekiti wenu wa chipukizi Taifa.
“Ya kwanza ndugu wajumbe, siasa ni uchumi hatuwezi chipukizi kukaa kinyonge nitahakikisha ninasimamia mambo ya uchumi na uzalishaji mali,na kuanzisha mfuko maalum wa chipukizi ili kuwasaidia makatibu hamasa katika kamati zao za uendeshaji.
“Pili, ninafahamu kwamba, makatibu hamasa wa wilaya si wajumbe wa Baraza la Mkoa na makatibu hamasa wa mkoa si wajumbe la Baraza la Taifa.
“Nipeni ridhaa hii ya kuwa mwenyekiti wenu ili nifikishe kilio chenu katika vikao halali vya chipukizi na Jumuiya ya Vijana,niazimeni Imani ili niwalipe utumishi uliotukuka kwa maslahi ya chama chetu na jumuiya yetu.
“Ndugu wajumbe ukisoma maneno ya Mwenyenzi Mungu yanasema watu wangu wanaangamia kwa kukosa maarifa, siko tayari kuwaona mnaangamia kwa kukosa maarifa.
“Nitahakikisha ninasimamia mafunzo, elimu na siasa ya Chama Cha Mapinduzi na kuandaa viongozi bora wa baadae wanaotokana na CCM.
“Ndugu wajumbe, siasa ni mahusiano Wapemba wanasema, kama haujui bahari ilipo tumia mto kwenda, na mimi Qailah Nurdin Bilal nipo tayari kuwa mto na kiunganishi kati ya chipukizi na viongozi wetu wote wa UVCCM nikishirikiana na ndugu yangu, Ali Mohamed Kawaida ili kutimiza ndoto za chipukizi wote Tanzania,”amefafanua Qailah Nurdin Bilal wakati akiomba kura.
Qayllah ameshinda kwa kupata kura 303 kati ya kura halali 429 zilizopigwa huku akiwashinda wenzake watatu aliokuwa akishindana nao.
Watoto wengine waliogombea uchaguzi huo ni mtoto wa Waziri wa Fedha, Dkt. Mwigulu Nchemba, mtoto wa Waziri wa Ardhi, Jerry Silaa.