ZANZIBAR-Waziri wa Ardhi na Maendeleo ya Makaazi,Mhe. Rahma Kassim Ali amesema Serikali itaendea kuvijengea uwezo vikosi vya ulinzi na usalama nchini ili viendelee kulinda wananchi na mali zao.
Akizungumza katika Uzinduzi wa Ofisi ya Kikosi cha Zimamoto na Uokozi Kanda ya Kaskazini huko Mahonda amesema, Serikali imejenga majengo bora na vifaa wezeshi ili vikosi hivyo vizidi kufanya kwa kazi kwa ufanisi.
Amesema kuwa, ujenzi wa jengo la ofisi hiyo umezingatia mahitaji ya kikosi hicho katika Kanda hiyo ambayo ina uwekezaji mkubwa kwa lengo la kukabiliana na majanga mbalimbali pale yanapojitokeza.
Naye Mkuu wa Mkoa wa Kaskazini Unguja, Rashid Hadid Rashid amekipongeza kikosi hicho kwa uaminifu wanaouonesha katika ujenzi wa miradi mbalimbali nchini.
Mradi wa Ujenzi huo umesimamiwa na Kikosi cha Zimamoto na Uokozi na kugharimu shilingi milioni 880 hadi kukamilika kwake.