BoT yaendesha kikao elimishi kwa mabenki, taasisi nyingine za kifedha

DAR ES SALAAM-Benki Kuu ya Tanzania (BoT) tarehe 15 Februari 2024 imeendesha kikao elimishi kwa mabenki na taasisi nyingine za fedha kuhusu miongozo ya kiutendaji ya Mfuko wa Udhamini wa Mikopo kwa ajili ya Mauzo Nje ya Nchi (ECGS) na Mfuko wa Udhamini wa Mikopo kwa Wajasiriamali Wadogo na wa Kati (SMEs-CGS).

Akifungua kikao hicho, Kaimu Mkurugenzi wa Ustawi na Huduma Jumuishi za Fedha, Bi. Nangi Massawe, alisema mifuko hiyo ilianzishwa na serikali kwa lengo la kuimarisha miundombinu itakayosaidia miradi ya mbalimbali ya biashara inayokosa dhamana kupata mikopo kutoka kwa mabenki na taasisi nyingine za fedha.

Bi. Massawe alizihimiza taasisi hizo kuwa na tathmini na usimamizi mzuri wa waombaji udhamini ili kupunguza mikopo chechefu.

Pia, kuongeza idadi ya mikopo kwa watu ambao hawajafikiwa na huduma za kifedha hasa wanaoishi vijijini, kuchochea ujasiriamali mdogo na wa kati

Sambamba kushirikiana na Serikali katika kutoa mikopo kwa sekta za kimkakati kama kilimo, madini na uzalishaji kwa lengo la kustawisha uchumi wa nchi.

Nao wawakilishi wa mabenki na taasisi za fedha waliishukuru Serikali kwa kurejesha mifuko hii kutokana na mchango wake katika kuimarisha sekta ya fedha.

Aidha, waliahidi kuendelea kutoa mawazo ya kiubunifu ili kuimarisha malengo ya mpango huo.

Serikali ilianzisha mifuko ya ECGS) mwaka 2002 na SMEs-CGS mwaka 2005.