TMA:Kimbunga Hidaya kimefikia mwisho hakuna tena tishio nchini

DAR-Taarifa hii inahitimisha mfululizo wa taarifa za kilichokuwa Kimbunga Hidaya zilizokuwa zikitolewa na Mamlaka ya Hali ya Hewa Tanzania (TMA) tangu Mei 1, 2024.

Kwa mujibu wa taarifa iliyotolewa na TMA, mwenendo wa mifumo ya hali ya hewa unaonesha kuwa katika kipindi cha saa sita zilizopita, Kimbunga Hidaya kimepoteza kabisa nguvu yake baada ya kuingia nchi kavu katika Kisiwa cha Mafia.

Aidha, mabaki ya mawingu ya mvua yaliyokuwa yakiambatana na kimbunga hicho yalisambaa katika maeneo mbalimbali ya ukanda wa kusini mwa nchi yetu hususan katika maeneo ya mikoa ya Lindi, Mtwara, Morogoro na maeneo jirani.

Hivyo, hakuna tena tishio la kimbunga Hidaya katika nchi yetu.

Hata hivyo, vipindi vya mvua za kawaida za masika zinatarajiwa kuendelea katika baadhi ya maeneo hasa ya Ukanda wa Ziwa Victoria, Nyanda za Juu Kaskazini-Mashariki na Ukanda wa Pwani ya Kaskazini.

USHAURI: Wananchi wanashauriwa kuendelea kufuatilia na kuzingatia taarifa za utabiri kutoka Mamlaka ya Hali ya Hewa Tanzania pamoja na maelekezo na miongozo inayotolewa na mamlaka husika.