Heko Chuo Kikuu Huria cha Tanzania

NA DKT.OMARY MOHAMED MAGUO

SHAIRI la hamasa na shamrashamra za kusherehekea miaka 30 ya Chuo Kikuu Huria cha Tanzania (OUT).

Kilele cha maadhimisho kitakuwa ni tarehe 30 Novemba, 2024 na ikitanguliwa na matukio mbalimbali mpaka kufikia tarehe hiyo.

Karibuni sana wananchi, wahitimu, wanafunzi, na wadau wote wa elimu tusherehekee mafanikio makubwa ya miaka 30 ya OUT.

SHAIRI NAMBARI MBILI

1

Thelathini kutimia, Huria inapendeza

Nguvu kazi Tanzania, Huria imeongeza

Mijini na vijijia, huduma zimechanuza

Heko kwa chuo Huria, Thelathini kutimiza

2

Fursa kimefunguwa, makundi kimefikia

Hakuna kubaguliwa, kwa jina wala jinsia

Wabara na wa visiwa, me'soma chuo Huria

Heko kwa Chuo Huria, Thelathini kutimiza

3

Walobanwa majukumu, ya kazi na familia

Me'soma wakahitimu, bila kazi kuachia

Wakaipata elimu, manufaa Tanzania

Heko kwa chuo Huria, Thelathini kutimiza

4

Kwa umma wanahudumu, mandeleo kupatia

Kwa weledi ukarimu, jamii yafurahia

Kwa ujuzi na ufahamu, wahitimu mardhia

Heko kwa chuo Huria, Thelathini kutimiza

5

Alumni wabunifu, zao chuo Huria

Wamejawa uzoefu, bingwa kujitafutia

Kwenye kazi watiifu, ujuzi wanatumia

Heko kwa chuo Huria, Thelathini kutimiza

6

Chuo chetu twakisifu, nchi nzima kufikia

Kimepunguza urefu, wasoma umetulia

Kwa nafuu masurufu, ada ya chuo Huria

Heko kwa chuo Huria, Thelathini kutimiza

7

Wa Huria tujipambe, kwa furaha tabasamu

Tuwe mbele tujigambe, tutuma zetu salamu

Na Mwenyezi tumuombe, Huria yetu idumu

Heko kwa chuo Huria, Thelathini kutimiza

MTUNZI

Dkt.Mohamed Omary Maguo

Mshairi wa Kisasa

Mhadhiri Mwandamizi na Mkuu wa Itifaki

Chuo Kikuu Huria cha Tanzania.