KILIMANJARO-Chuo Kikuu Huria cha Tanzania kimeunganisha wadau mbalimbali kujadili na kupata njia nzuri itakayofanikisha uwekaji wa darubini katika tambarare ya mlima Kilimanjaro ili kuchochea utalii wa anga kwa watalii wanaotembelea mlima huo.
Kufanikisha hilo, OUT imeitisha mkutano wa wadau mbalimbali wa Utalii, Sayansi na Teknolojia uliofanyika katika chuo cha Uongozi cha Mwalimu Nyerere kilichopo Kibaha mkoani Pwani uliofanyia kwa siku mbili Agosti Mosi na Agosti 2, 2024, ambapo wadau kutoka Wizara mbalimbali zikiwamo wizara za Maliasili na Utalii, Wizara ya Elimu, Sayansi na Teknolojia, Wizara ya Habari, Mawasiliano na Teknolojia ya Habari, Vyuo Vikuu pamoja na wadau mbalimbali kutoka ndani na nje ya nchi waliweza kushiriki.
Akiongea katika mkutano huo Mtaalam wa Astronomia na Mtafiti mkuu wa mradi huo, Dkt. Noorali Jiwaji, amesema majadililiano yamejikita katika kuhakikisha kuwa uwekaji wa darubini hiyo ambayo itasimikwa katika tambarare ya mlima Kilimanjaro baina ya vilele vya Kibo na Mawenzi haiwezi kuharibu mandhari ya mlima huo pamoja na shuguli za kiutalii zaidi iongeze watalii katika mlima huo.
Amesema, pia mkutano huu umekuwa ni mwendelezo wa mkutano wa awali uliofanyika katika mji wa Marangu mkoani Kilimanjaro ambao ulihusisha zaidi wenyeji kuzunguka hifadhi ya mlima Kilimanjaro wakiwemo watu binafsi, wafanyabiashara, mashule, vyuo na taasisi zinazosimamia shughuli za uhifadhi na utalii wa mlima huo ikiwamo mamlaka ya Hifadhi ya Mlima Kilimanjaro (KINAPA).
Chuo Kikuu Huria cha Tanzania kimekuwa na mkakati wa muda mrefu wa uwekaji wa darubini katika mlima Kilimanjaro ambapo watalii wataweza kushuhudia zao jipya la utalii wa anga kwa kuweza kutazama nyota na vivutio vipatikanavyo angani.
Mradi huu unahamasishwa zaidi kutokana na uwepo wa uchafuzi wa anga katika nchi zilizoendelea kiasi cha anga zao kushindwa kuonekana vyema hivyo kuhitaji maeneo ambayo yana anga safi na linaonekana vyema, hivyo uwepo wa darubini utachochea watalii wa anga na watafiti katika maeneo ya mlima Kilimanjaro.