Mama wa Kinara dawa za kulevya nchini naye apandishwa kizimbani, watazame wote hapa

DAR-Watuhumiwa watano wa usafirishaji wa bangi aina ya skanka kiasi cha tani 1.8, ambao ni Richard Mwanri (47), na mama yake Felista Mwanri (70), pamoja na wengine watatu leo Septemba 10, 2024, wamepandishwa kizimbani katika Mahakama ya Hakimu Mkazi Kisutu jijini Dar es Salaam.

Washtakiwa wengine katika kesi hiyo ni Athuman Mohamed maarufu kama Makame (58) mkazi wa Tanga, Juma Chappa (36) mkazi wa Kiwalani, na Omary Mohamed (32) ambaye ni dereva na mkazi wa Buza, Dar es Salaam.

Wakili wa Serikali, Eric Davis amesoma hati ya mashtaka mbele ya Hakimu Mkazi Mwandamizi, Godfrey Mhini. 

SOMA:DCEA yamdaka Kinara wa dawa za kulevya nchini

Amedai kuwa, washtakiwa wanakabiliwa na shtaka la kusafirisha aina hiyo ya dawa za kulevya kinyume na sheria. 

Amesema kuwa, mnamo Agosti 28, 2024, wakiwa eneo la Tairo Luguruni barabara ya Kwembe ndani ya Wilaya ya Ubungo, walikamatwa wakiwa na bangi yenye uzito wa kilogramu 1,815.

Wakili Davis amefafanua kuwa, upelelezi wa kesi hiyo bado haujakamilika na akaomba tarehe nyingine kwa ajili ya kutajwa kwa shauri hilo.

Hakimu Mhini amewaeleza washtakiwa kuwa kesi yao ni ya Uhujumu Uchumi, na kwa hivyo hawatapaswa kujibu chochote kwa sasa kwa sababu mahakama hiyo haina mamlaka ya kusikiliza kesi za aina hiyo.

Hakimu Mhini ameahirisha kesi hiyo hadi Septemba 24, 2024 kwa ajili ya kutajwa na kupokea taarifa kuhusu maendeleo ya upelelezi.