MARA-Timu ya Mara Sports Academy imetwaa kombe la Polisi Jamii Cup baada ya kuibuka kidedea kwa kuifunga Mshikamano FC kwa bao 1-0.
Fainali ya mashindano ya Polisi Jamii Cup yalifanyika Septemba 29,2024 mkoani hapa ambapo,Mara Sports Academy, kama mshindi wa kwanza walijinyakulia zawadi ya ng'ombe mmoja na mipira miwili.
Mshindi wa pili, Mshikamano FC, walijinyakulia mbuzi mmoja na mipira miwili, huku mshindi wa tatu akiambulia mipira miwili.
Zawadi hizo zilikabidhiwa kwa manahodha wa timu zote na mgeni rasmi, alikuwa Kaimu Kamanda wa Polisi Mkoa wa Mara, Kamishna Msaidizi wa Polisi Nenrad Sindano, ambaye alisisitiza umuhimu wa mashindano haya katika kuimarisha uhusiano kati ya jamii na Jeshi la Polisi.