MAPUTO-Mkuu wa Majeshi ya Ulinzi Tanzania, Jenerali Jacob John Mkunda amefanya ziara ya kikazi nchini Msumbiji kuanzia tarehe 23 hadi 27 Septemba, 2024.
Kwa mujibu wa taarifa kutoka Ubalozi wa Jamhuri ya Muungano wa Tanzania nchini Msumbiji, wakati wa ziara hiyo, pamoja na masuala mengine, Jenerali Mkunda alitembelea Ubalozi wa Tanzania uliopo jijini Maputo tarehe 24 Septemba, 2024 na tarehe 25 Septemba, 2024 alishiriki kwenye Maadhimisho ya Miaka 60 ya Jeshi la Ulinzi la Msumbiji.
Wakati wa Maadhimisho hayo, Jenerali Mkunda alitunukiwa na Mhe. Filipe Jancito Nyusi, Rais wa Jamhuri ya Msumbiji, Nishani Maalum ya Heshima kwa kutambua na kuheshimu mchango wa Tanzania katika ukombozi na ustawi wa amani na usalama nchini Msumbiji.
Vilevile, tarehe 26 Septemba 2024, Jenerali Mkunda alikutana na mwenyeji wake, Admiral Joaquim Rivas Mangrasse, Mkuu wa Majeshi ya Ulinzi ya Msumbiji na kuzungumza masuala mbalimbali ya Ushirikiano kati ya JWTZ na Jeshi la Ulinzi la Msumbiji (FADM) ambapo Viongozi hao walikubaliana na kusisitiza juu ya haja ya kuendelea kushirikiana kwa ukaribu kwa maslahi ya nchi zetu mbili.