NA JAMES MWANAMYOTO
OR-TAMISEMI
NAIBU Katibu Mkuu, Ofisi ya Rais - TAMISEMI Bw. Sospeter Mtwale amesema, Ofisi ya Rais-TAMISEMI imeandaa mafunzo ya siku mbili ya kuwajengea uwezo wataalamu wa uhifadhi wa mazingira kutoka katika baadhi ya mikoa na mamlaka za serikali za mitaa ambazo zimeanza utekelezaji wa miradi itokanayo na biashara ya kaboni, ili kuziwezesha kukabiliana na changamoto kubwa ya uelewa iliyojitokeza wakati wa utekelezaji wa miradi hiyo.
Naibu Katibu Mkuu, Ofisi ya Rais-TAMISEMI Bw. Sospeter Mtwale akiwa katika picha ya pamoja na wataalam wa uhifadhi wa mazingira kutoka katika mikoa 5 na halmashauri za wilaya 19, mara baada ya kufungua mafunzo hayo yanayofanyika katika ukumbi mdogo wa Ofisi ya Mkuu wa Mkoa wa Dodoma.
Bw. Mtwale amesema hayo leo katika Ukumbi Mdogo wa Ofisi ya Mkuu wa Mkoa Dodoma wakati akifungua mafunzo hayo ya siku mbili kwa maafisa na wataalamu wanaosimamia uhifadhi wa mazingira katika mikoa mitano na halmashauri 19 zinazotekeleza miradi ya biashara ya kaboni nchini.
“Ninawakumbusha lengo la mafunzo haya ni kuwajengea uwezo kuhusu masuala ya mabadiliko ya tabianchi na biashara ya kaboni, hivyo mada mbalimbali zimeandaliwa kuwawezesha kutambua athari za mabadiliko ya tabianchi na pamoja na kujua njia za kuhimili biashara ya kaboni nchini,” Bw. Mtwale amefafanua.
Naibu Katibu Mkuu, Ofisi ya Rais - TAMISEMI Bw. Sospeter Mtwale akifungua mafunzo ya kuwajengea uwezo wataalam wa uhifadhi wa mazingira kutoka katika mikoa mitano na halmashauri za wilaya 19, yanayofanyika katika ukumbi mdogo Ofisi ya Mkuu wa Mkoa wa Dodoma.Bw. Mtawale amesema kuwa, anatarajia mafunzo hayo yatatoa mwelekeo sahihi wa namna bora ya kuratibu na kutekeleza shughuli mbalimbali za kukabiliana na kuongeza uhimili wa athari za mabadiliko ya tabia nchi.
“Hakikisheni mnakuwa na ushirikiano wa kutosha katika kuandaa mipango na bajeti ikiwa ni pamoja na kuandaa miradi ya biashara ya kaboni ili kuimarisha ustawi wa taifa letu,” Bw. Mtwale amesisitiza.
Akizungumza kwa niaba ya washiriki wa mafunzo, Afisa Maliasili na Mazingira wa Mkoa wa Manyara Bw. Michael Gwandu amesema kuwa, wamepokea mwongozo na maelekezo mahususi ya namna ya kuzingatia mafunzo ya kukabiliana changamoto ya mabadiliko ya tabianchi pamoja na biashara ya kaboni kwa ajili ya ustawi na maendeleo ya taifa.
Mkurugenzi wa Idara ya Tawala za Mikoa OR-TAMISEMI Bi. Beatrice Kimoleta, akieleza lengo la mafunzo ya kuwajengea uwezo Wataalam wa Uhifadhi wa Mazingira kutoka katika mikoa 5 na Halmashauri 19, kabla ya Naibu Katibu Mkuu, Ofisi ya Rais-TAMISEMI Bw. Sospeter Mtwale kufungua mafunzo hayo katika Ukumbi Mdogo wa Ofisi ya Mkuu wa Mkoa Dodoma.
Mratibu wa Mabadiliko ya tabianchi wa OR-TAMISEMI Bi. Hawa Mwechaga akitoa mwongozo wakati wa mafunzo ya kuwajengea uwezo Wataalam wa Uhifadhi wa Mazingira kutoka katika mikoa 5 na Halmashauri 19, mara baada ya Naibu Katibu Mkuu, Ofisi ya Rais-TAMISEMI Bw. Sospeter Mtwale kufungua mafunzo hayo katika Ukumbi Mdogo wa Ofisi ya Mkuu wa Mkoa Dodoma.
Wataalam wa uhifadhi wa mazingira kutoka katika mikoa mitano na halmashauri za wilaya 19 zinazotekeleza miradi ya biashara ya kaboni, wakimsikiliza Naibu Katibu Mkuu, Ofisi ya Rais - TAMISEMI Bw. Sospeter Mtwale (hayupo pichani) wakati akifungua mafunzo ya kuwajengea uwezo wataalam hao yanafanyika katika ukumbi mdogo Ofisi ya Mkuu wa Mkoa wa Dodoma.Kwa upande wake, Mkurugenzi wa Idara ya Tawala za Mikoa OR-TAMISEMI Bi. Beatrice Kimoleta amesema mafunzo hayo yamehudhuriwa na wawakilishi wa mikoa ya Dodoma, Kagera, Manyara, Arusha, Katavi na Ruvuma pamoja na wa halmashauri 19 ambao katika maeneo yao wameanza utekelezaji wa biashara ya kaboni; Mafunzo yatawajengea uwezo na kuwapa fursa ya kubadilishana uzoefu katika utekelezaji wa miradi ya biashara ya kaboni pamoja na kukabiliana na changamoto ya mabadiliko ya tabianchi.
Ofisi ya Rais-TAMISEMI imeandaa mafunzo hayo ya siku mbili kwa wataalamu wa uhifadhi wa mazingira, ikiwa ni sehemu ya utekelezaji wa jukumu la kusimamia shughuli zote za uhifadhi, utunzaji na usimamizi wa mazingira katika ngazi za mikoa na halmashauri.