ZANZIBAR-Makamu Mwenyekiti wa Chama Cha Mapinduzi (CCM) Zanzibar, Rais wa Zanzibar na Mwenyekiti wa Baraza la Mapinduzi, Dkt.Hussein Ali Mwinyi amezisisitiza jumuiya za chama hicho kuzitumia rasilimali vizuri kwa lengo la kukijengea uwezo kiuchumi.
Dkt.Mwinyi ameyasema hayo leo alipozindua Jengo jipya la Ofisi ya Jumuiya ya Wazazi ya Chama Cha Mapinduzi Wilaya ya Mfenesini huko Wilaya ya Magharibi A.
Aidha,Makamu Dkt.Mwinyi amefahamisha kuwa,kazi za siasa zinahitaji fedha nyingi,hivyo chama ni lazima kiwe na miradi inayozalisha ili kujijenga kiuchumi.Dkt.Mwinyi ameupongeza Uongozi wa Jumuiya ya Wazazi Wilaya ya Kichama Mfenesini kwa Kujenga Jengo la kisasa la jumuiya hiyo na kuwa na dhamira ya kuanzisha miradi ya ushonaji na ukumbi wa shughuli mbalimbali.
Halikadhalika Dkt.Mwinyi ameahidi kwa Chama Cha Mapinduzi kuunga mkono miradi ya kimkakati ya itakayoanzishwa na jumuiya zote za chama hicho ili ziweze kujitegemea.
Akizungumzia suala la udhalilishaji wa kijinsia, Dkt.Mwinyi ametoa wito kwa jamii kuanzia ngazi ya familia kwa kila mmoja kutimiza wajibu wa kukemea na kukomesha vitendo hivyo ndani ya jamii.