ZANZIBAR-Rais wa Zanzibar na Mwenyekiti wa Baraza Mapinduzi, Dkt.Hussein Ali Mwinyi amelihakikishia Shirikisho la Soka barani Afrika (CAF) kuwa, Zanzibar ipo tayari na inajiandaa vema kufanikisha Mashindano ya CHAN yanayotarajiwa kufanyika Februari,mwakani.
Rais Dkt.Mwinyi ameyasema hayo leo tarehe 19 Disemba, 2024 alipozungumza na Rais wa Shirikisho la Soka barani Afrika (CAF), Patrice Motsepe aliyefika Ikulu jijini Zanzibar.
Aidha,Rais Dkt. Mwinyi ameeleza kuwa,Serikali inaendelea na ujenzi wa miundombinu ya viwanja kwa kasi kubwa ili ikamilike kwa wakati na kufanikisha mashindano hayo na kuishukuru CAF kwa kuiamini Zanzibar.
Rais Dkt.Mwinyi amesisitiza kuwa, mbali na viwanja pia Serikali inajiandaa na kuwa na hoteli bora na za kutosha zitakazokuwa na uwezo wa kupokea wageni watakaofika kwa ajili ya mashindano hayo na huduma bora.
Naye, Rais wa CAF Patrice Motsepe ameeleza kufarijika na maandalizi ya Uwanja wa New Amani Complex na utayari wa Zanzibar kufanikisha mashindano hayo.
Pia,Rais Motsepe amesifu juhudi zinazoendelea za kuimarisha viwanja vya ndege, miundombinu ya barabara na ongezeko la hoteli mambo aliyosema kuwa ni muhimu katika kufanikisha mashindano.