NA DIRAMAKINI
SIMBA Sports Club ya jijini Dar es Salaam imechukua alama tatu ugenini dhidi ya CS Sfaxien kukwea kileleni mwa msimamo wa Kundi A la Kombe la Shirikisho barani Afrika (CAFCC).
Aidha,CS Sfaxien ambao mwishoni mwa mwaka jana waliwafanyia fujo Simba SC katika Dimba la Benjamin Mkapa lililopo Halmashauri ya Manispaa ya Temeke jijini Dar es Salaam wameondolewa rasmi kwenye kinyang'anyiro cha kwenda robo fainali.
Simba SC imepata ushindi huo katika mchezo wa Kombe la Shirikisho barani Afrika uliopigwa Uwanja wa Hammadi Agrebi nchini Tunisia.
Wenyeji Sfaxien walianza kwa kasi dakika 20 za mwanzo kwa kufanya mashambulizi ya haraka,lakini Simba SC walikuwa imara kuwadhibiti.Jean Charles Ahoua aliwapatia Simba SC bao hilo pekee dakika ya 34 kwa shuti kali akiwa ndani ya 18 baada ya kumalizia pasi ya Leonel Ateba kufuatia mpira mrefu uliopigwa na Che Fondoh Malone.
Kipindi cha pili, Simba SC waliongeza kasi ya kutafuta bao la pili huku wakiwa makini zaidi kwenye kuzuia ili wasiruhusu bao.Ushindi wa leo umewafanya kufikisha alama tisa na kuwa vinara wa kundi baada ya kucheza mechi nne.
Leo Kocha Fadlu Davids amefanya mabadiliko ya mchezaji mmoja ukilinganisha na kikosi kilichocheza mechi ya mwisho ya Ligi Kuu ya NBC Tanzania Bara dhidi ya Singida Black Stars.
Kocha Fadlu amemuanzisha Leonel Ateba akichukua nafasi ya Steven Mukwala ambaye ameanzia benchi.
Moussa Camara (40), Shomari Kapombe (12), Mohamed Hussein (15), Abdurazack Hamza (14), Che Malone Fondoh (20), Yusuph Kagoma (21) Denis Kibu (38), Fabrice Ngoma (6), Lepnal Ateba (13), Elie Mpanzu (34), Jean Charles Ahoua (10)Wachezaji wa Akiba:
Ally Salim (1), Kelvin Kijili (33), Karaboue Chamou (2), Augustine Okejepha (25), Mzamiru Yassin (19), Ladaki Chasambi (36), Debora Fernandes (17), Steven Mukwala (11), Awesu Awesu (23).