WINDHOEK-Mwasisi wa Taifa la Jamhuri ya Namibia, Rais mstaafu Samuel Shafiishuna Daniel Nujoma (Sam Nujoma) amefariki akiwa na miaka 95.
Nujoma alifariki Jumamosi jioni, baada ya kulazwa hospitalini kwa wiki tatu akipambana na ugonjwa ambao hakuweza kuupona.
Rais wa Namibia, Nangolo Mbumba, alitangaza kifo chake na kusema, "Kwa huzuni na maskitiko makubwa, tunatangaza kufariki kwa mpigania uhuru wetu anayeheshimika na kiongozi wetu wa mapinduzi.
"Baba yetu Mwanzilishi aliishi maisha marefu na yenye matokeo muhimu, ambapo alitumikia kwa njia ya kipekee wananchi wa nchi yake anayoipenda."
Kama Rais wa kwanza wa Namibia, Nujoma alitunga sera za maendeleo za kitaifa, akisisitiza umoja, maendeleo ya kijamii, na ustawi wa uchumi.
Pia,alihudumu katika nafasi hiyo kwa vipindi viwili vya miaka kumi, kuanzia 1990 hadi 2005.
Vilevile aliongoza taifa lake kwa mikono ya uongozi madhubuti, akijitahidi kuboresha hali ya maisha ya wananchi wa Namibia na kulinda uhuru na usalama wa taifa.
Nujoma alikuwa mtaalamu wa ushawishi, na aliweka mikakati ya kudumisha amani na ushirikiano wa kimataifa, hasa na nchi za kanda ya Kusini mwa Afrika.
Kwa mchango wake mkubwa katika mchakato wa kupata uhuru na kuongoza taifa huru, alikubalika na kuthaminiwa kama Baba Mwanzilishi wa Taifa la Namibia.
Nujoma baada ya kumaliza muda wake madarakani mwaka 2005, alijitokeza kidogo hadharani na alijitolea kwa familia yake, akiongoza maisha ya faragha.