DAR-Chama cha Demokrasia na Maendeleo (CHADEMA) kimekumbwa na kashfa mpya inayohusisha malalamiko ya watumishi wake wa zamani, ambao wamedai kuwa chama hicho kimekosa haki na uwajibikaji katika kumudu majukumu yake ya msingi kwa watumishi wake.
Barua iliyovuja kutoka kwa Makatibu wa Kanda wa chama hicho wa kipindi cha 2015-2025 imezua gumzo kali miongoni mwa wanachama na wafuasi, huku ikionyesha picha mbaya ya uongozi mpya wa chama hicho.
Katika barua hiyo iliyoelekezwa kwa Katibu Mkuu wa CHADEMA, Makatibu wa Kanda waliotumikia katika maeneo ya Nyasa, Kati, Magharibi, Kusini, na Pwani wameelezea masikitiko yao makubwa baada ya chama hicho kushindwa kukamilisha stahiki zao za kiutumishi baada ya kumaliza muda wao wa utumishi.
Wafanyakazi hao, ambao ni Gwamaka Mbugi, Emmanuel Masonga, Kangela Ismail, General Kaduma, na Jerry Kerenge, wamedai kuwa wameachwa bila malipo ya mafao yao, ikiwa ni pamoja na gharama za usafiri wa kurejea nyumbani na kiinua mgongo (mkono wa kwaheri), huku wakionyesha wasiwasi wa kutosha kwa ajili ya maisha yao ya baada ya utumishi.
“Pamoja na stahiki nyingine za kiutumishi ambazo tunaomba tukamilishiwe ni pamoja Gharama za Usafiri kurejea nyumbani kutoka eneo la kazi na Kinua mgongo (Mkono wa Kwaheri),” inasema sehemu ya barua hiyo.
Wafanyakazi hao wameonyesha kukerwa na jinsi chama kinavyowapuuza, huku wakisisitiza kuwa wametumikia chama kwa uaminifu kwa miaka kumi (2015-2025) lakini hawajapewa haki yao.
Hali hii inaibua maswali mengi kuhusu uadilifu wa uongozi wa CHADEMA, hasa linapokuja suala la kuwajali watumishi wake ambao wamekuwa nguzo za chama katika maeneo mbalimbali nchini.
Ikiwa chama kinashindwa kuwajibika kwa wafanyakazi wake wa zamani, je, kinaweza kuaminiwa na wananchi wa kawaida katika kumudu majukumu ya kitaifa? Wengi wameanza kutilia shaka ahadi za CHADEMA za kuleta haki na usawa, wakati wao wenyewe wanashindwa kuwatendea haki watu waliowatumikia kwa bidii.
Aidha, barua hiyo inaonyesha kuwa CHADEMA haikuwa na mpango wa kuendelea na makatibu hao baada ya kumudu wajibu wao, jambo ambalo linazua maswali kuhusu uwazi wa chama katika uendeshaji wake.
“Tumekuwa watumishi wa chama kwa kipindi cha 2015-2020 na baadae mwaka (2020-2025) … baada ya chama kuto kuwa na nafasi ya kuendelea nasi katika utumishi wa chama,” walisema wafanyakazi hao. Hili linaonyesha ukosefu wa mipango ya muda mrefu ya kumudu rasilimali watu ndani ya chama, jambo ambalo linaweza kuathiri ufanisi wake wa kisiasa.
Wakosoaji wa CHADEMA wamesema kuwa tukio hili ni dalili ya tabia ya chama hicho ya kutojali wafanyakazi wake, huku uongozi wa juu ukijishughulisha na siasa za chuki badala ya kushughulikia masuala ya msingi ya chama.
“CHADEMA wamekuwa wakijidai kuwa chama cha haki na usawa, lakini hawawezi hata kuwatendea haki watu waliowasaidia kufika hapa walipo. Hii ni aibu kubwa,” alisema mchambuzi wa siasa.
Huku CHADEMA ikiendelea kujitangaza kama chama cha “People’s Power,” wengi sasa wanaanza kuona picha tofauti-chama kinachowapuuza watu wake na kushindwa kuwajibika. Ikiwa chama hiki kitashindwa kushughulikia malalamiko haya, kuna uwezekano mkubwa wa kupoteza imani ya wanachama wake na wafuasi, hasa katika kipindi hiki ambacho siasa za Tanzania zinahitaji uadilifu na uwajibikaji wa hali ya juu.
Wakati huu, CHADEMA bado haijatoa tamko rasmi kuhusu madai haya, lakini wengi wanasubiri kuona jinsi watakavyoshughulikia suala hili linalohusisha haki za wafanyakazi wao wa zamani.
Hadi hapo, picha ya chama hicho inaendelea kuharibika mbele ya macho ya umma.